Bengaluru, ïaïong:
Uwei na u nongkhaïi drok bad jingdih pynbuaid uba shyrkhei ïa uba la tip kyrteng kum u Aditya Rana, uba la shah thong ha ka khlieh jong u da kumba T. 2.5 lak ka buskit lada ai jingtip ne ïarap ban ïohkem ïa u, u la shah siat ïap ha ka jingïasiat bad ki pulit ha Bijnor kaba don ha Uttar Pradesh, ha ka por ba dang step bha hynnin ka sngi. Ki la don kumba san ngut ki pulit kiba la mynsaw ha ka por ba la don ka jingïasiat kaba markylliang, ha kaba hadien kane ka jingjia la pynkit ïa ki sha ka jaka ai jingsumar.
Ïa u Rana la kwah ban kem da ki pulit na ka bynta bun bnai bad ki la don kumba 45 tylli mukotduma ba la mudui pyrshah ïa u ha kiba bun ki distrik jong ka Uttar Pradesh. Ha u bnai Nailar jong u snem ba la lah, u la lait phet na kti jong ki pulit ha Shahjahanpur ha ka por ba la ïalam ïa u sha Lucknow hadien ba u la dep ban leit mih hakhmat ka ïingbishar ha Bijnor. Hadien kane, u DGP u la rai ban tyrwa noh da ka buskit kaba T. 2.5 lak halor jong u.
Ha kaba ïadei bad ka jingbatai halor ka jingjia ba la jia, u SP jong ka Bijnor u Neeraj Kumar Jadaun u la ong ba ha ka miet jong ka sngi Ba-ar, u la ïoh jingtip ba u Rana u la pynlong jaka rieh ha ka thaiñ Budhanpur jong ka nongbah. Hadien ba la ïoh ïa ki jingtip kiba bniah, ki pulit ki la leit kerkut ïa katei ka thaiñ.
Ka jingïasiat kaba markylliang ka la mih hadien ba u Rana bad ki nongïarap jong u ki la siat sha ka phang ba don ki pulit. U Rana u la ïap ha ka jingshah siat ha ki puilt, katba ki nongïarap jong u ki la lait phet na katei ka jaka.
Ki heh pulit ki la ïathuh ba ka jingleit thwet ïa kine kiba la phet rieh ka dang ïai bteng. Ki la don baroh kumba hynriew ngut ki dkhot jong ka kynhun runar jong u Aditya Rana ïa kiba la shah set hashwa ha patok, katba ïa ki 48 ngut ki dkhot jong ka kynhun la lah ban ithuh.
