Thiruvananthapuram:
Wad lada la khang da ka sorkar jylla bad da ka sorkar kmie, ka jingpynmih ïa ki tiar plastik bad ki SUP ka dang ïai bteng ha ka ban pyndonkam ha ki ïew kiba don ha Kerala.
Ki kynhun treikam kiba kyrpang ïa kiba la dep ban buh na ka bynta ban pyntreikam ïa ki kyndon ba ïadei bad ki jaboh ha kylleng ki jaka jong ka jylla ki la ïoh ban kurup ïa kumba 25 tonne ki tiar plastik ïa kiba la khang ban pynmih bad pyndonkam naduh ba la don ka jingleit khynra kaba la long ha u bnai ba la lah.
Ïa kine ki kynhun kiba kyrpang la pyntreikam hadien ba ka la don ka jingtuklar na ka High Court ha kaba ïadei bad ka jingpluh ka jaka theh ñiut kaba don ha Brahmapuram.
Ha ka por ba ka la don ka jingleit khynra ha ka por ka bym shym poi pyrkhat kaba la long hapdeng ka 23 tarik, Lber bad ka 4 tarik, Ïaïong, ka kynhun ba la thung kyrpang ka la buh jingmudui ha kumba 1,083 tylli ki jingjia jong ki jingpynkheiñ kyndon bad ruh daiñ kuna na ki nongpynkheiñ kyndon ha kaba baroh ka kuna ba la ïohlum ka la long T. 16 lak.
Ïa kiba bun ki tiar plastik kiba la shah khang ban pyndonkam, kiba kynthup ïa ki Straw, ki tiar ba la dei ban bret hadien ba la dep ban pyndonkam bad ki pla plastik la ïoh ban kurup ha ka por ba la don ka jingleit khynra.
“Ngi la thmu ban pynlong da ki klas na ka bynta ki dkhot jong ki kynhun bakyrpang ha kaba ïadei bad ka bor jong ki bad ka jingkitkhlieh na ka bynta ban ai ïa ka jingpynshitom sha ki nongpynkheiñ kyndon. Kine ki dkhot ba la shahjied ki la dei ban ithuh ïa ki tiar ïa kiba la shah khang ban pynmih ne pyndonkam bad kumjuh ka pisa ba la dei ban daiñ kuna ïa ki nongpynkheiñ kyndon,” la ong u heh sorkar.
U heh sorkar u la ong ba ka jingïai bteng ha kaba ïadei bad ka jingleit khynra kan sa ïarap ha ka ban pynduna ïa ki jingma kiba ap na ka jingpynmih bad ka jingpyndonkam ïa ki tiar plastik.
“Lada ngi lah ba leh ïa kane khlem sangeh, ngin sa lah ban rat naduh tyllong ïa ka jingpynmih ïa ki tiar plastik kiba la shah khang ban pynmih,” la ong shuh shuh u heh sorkar.
Hapoh ka kynhun kaba kyrpang ba la tip da ka Enforcement Squads la kynthup ruh ïa kiba na ka tnat pulit, Pollution Control Board (PCB), Suchitwa Mission, Internal Vigilance Wing bad LSGD.
Ka jingleit shabar pathar harud surok bad ha ki jaka paidbah bad ka jingthang ïa ki jaboh ki la long kiwei pat ki jingpynkheiñ kyndon kiba hap hapoh ka jingkhmih jong kane ka kynhun ba la shah thung.
