Lucknow, ïaïong:
Ka kynhun Enforcement Directorate (ED) haduh ba la thoh ïa kane khubor ka dang pynlong ïa ka jingleit khynra ha palat 12 tylli ki jaka kiba don ha Uttar Pradesh kum shi bynta ban tohkit halor ka jingdon jong ka jingjia kamai spah bymhok kaba long pyrshah ïa u runar uba la kylla long u riewsaiñ pyrthei u Atiq Ahmed. Une u riewsaiñ pyrthei kat haduh mynta u dang shah set patok naba shah rai pynrem ban shah set shirta jingim ha kaba ïadei bad ka jingjia jong ka jing-rahbor ïa u Umesh Pal kaba la jia ha u snem 2006, la ïathuh ka tyllong khubor.
Ka jingleit khynra ka la long ha ki jaka kiba kynthup ïa ka Phoolpur bad Prayagraj, bad kine ki don jingïadei bad ka jingjia jong ka jingkamai ïa ka spah bymhok kaba la mudui pyrshash ïa u Ahmed hashwa, na kane ka jingpyntreikam la ïoh ban kurup ïa ki jingdon jingem jong u, la ïathuh ka tyllong khubor.
Ka kynhun ED ka la pynlong ïa ka jingleit khynra pyrshah ïa ki briew kiba don ka jingïadei bad u Atiq Ahmed.
Ka kynhun tohkit jong ka sorkar kmie ka la pynlong ïa ka jingleit khynra ha ka ïing jong u nongïasaid aiñ jong u Atiq, u Khan Soulat Hanif, napdeng palat 12 tylli kiwei pat ki jaka kiba don ha Uttar Pradesh, la ïathuh shuh shuh ka tyllong khubor.
U Atiq Ahmed, ha ryngkat u nongïasaid aiñ jong u u Khan Soulat Hanif bad u Dinesh Pasi, dang shen ki la shah rai pynrem ba kin shah set shirta jingim ha patok ha kaba ïadei bad ka jingdonkti jong ki ban pynïap ïa u Umesh Pal, uba long u nongsakhi ba hakhmat eh ha kaba ïadei bad ka jingjia jong ka jingshah pynïap u MLA jong ka seng BSP ïa uba la tip kyrteng kum u Raju Pal.
