Srinagar, ïaïong:
Na ka jingkhmih bniah ïa ki jingpynshisha ba la phah da kiba bun ki Myntri Rangbah, haba khmih halor ka ïoh ka kot jong ki Myntri Rangbah la ong ba iwei-pa-iwei Myntri Rangbah na ki State Assembly bad ki Union Territory ki don ïa ka spah kaba T. 33.96 klur.
Na ki 30 ngut ki Myntri Rangbah kumba 29 gut (97%) ki dei ki heh spah.
Ka jingdon jingem kaba la kot sha ka T. 510 klur, ka dei jong u Myntri Rangbah jong ka Andhra Pradesh u Y S Jaganmohan Reddy ha kaba la bud da u Pema Khandu na Arunachal ha kaba u la don ïa ka spah kaba T. 163 klur. U Naveen Patnaik, u Myntri Rangbah jong ka Odisha u la wan ha ka kyrdan kaba lai ha kaba ïadei bad ka jingbun spah ha kaba ka la kot sha ka T. 63 klur. Kiba duna eh ha ka jingdon spah ki dei ka Myntri Rangbah jong ka West Bengal ka Mamata Banerjee.
Ka la pynshisha ba ka la don ïa ka spah kaba T. 15 lak. Hadien jong ka la bud da ki Myntri Rangbah jong ka Kerala bad jong ka Haryana, u Pinarayi Vijayan bad u Manohar Lal Khattar ha kaba kine baroh arngut ki la pynshisha ba ki la don ïa ka spah kaba T. 1 klur.
Ha ka jingkhmih bniah la paw ba 13 ngut na ki 30 ngut ki dei kiba dang sah ki mukotduma halor ki kam beaiñ kiba long pyrshah ïa ki.
Ïa ka jingkhmih bniah halor kane, la pyntreikam da ka Association for Democratic Reforms (ADR) and National Election Watch hadien ka jingphah jingpynshisha jong ki 30 ngut ki Myntri Rangbah jong ki jylla bapher bapher bad ki Union Territories.
Kumba la batai ka jingkhmih bniah, la ong ba na ki 30 ngut ki Myntri Rangbah na ki State Assemblies bad ki Union Territories la ong ba 13 ngut (43 per cent) ki Myntri Rangbah ki dei kiba la don ïa ki jingshah mudui mukotduma kiba long pyrshah ïa ki.
Kine ki 13 ngut ki Myntri Rangbah ki la shah pynbna ba ki la leh ïa ki kam beaiñ kiba shyrkhei kiba kynthup halor ka kam pynïap briew ka kam rahbor, ki kam kiba buh jingma ïa kiwei pat bad kiwei kiwei pat ki kam ba shyrkhei.
