Kolkata, ïaïong:
Kiba bun ki tiar pynbthei bom la lap na kawei ka kali ha Birbhum distrik kaba don ha West Bengal ha ka sngi Palei, shi sngi hashwa ka jingleit jngoh jong u Myntri ka sorkar kmie uba dei khmih ïa ka tnat ki kam pohïing u Amit Shah ha ka sngi ban rakhe ïa ka Bengali New Year.
Katkum ka jingïathuh jong ki nongshong shnong katei ka thaiñ la ong ba kawei ka Scorpio ka la ïeng harud surok hajan ka Guslara Bypass kaba hap hapoh ka Birbhum distrik naduh ka sngi Balang.
Hadien ba ym shym la don mano mano ruh ki ban wan kam trai ïa katei ka kali, ki nongshong shnong ki la ai jingtip noh sha ki pulit jong ka Murarai shaphang ka jingdon jong katei ka kali kaba la pynïeng ha katei ka jaka ha kaba la ithuh ba la don ei ei hapoh katei ka kali.
Hadien ba la ïoh jingtip halor ka jingdon jong katei ka kali, ka kynhun jong ki pulit ka la leit sha katei ka jaka bad ki la pynlong ïa ka jingkhmih bniah hapoh jong ka, ka kynhun ka la lap ïa 17 tylli ki synduk ha kaba kawei kawei ka la don ïakumba 200 tylli ki Gelatin Stick.
La khot ruh ïa ka kynhun pynduhbor ïa u bom sha katei ka jaka na ka bynta ban pynduh bor ïa ki bomb, hadien ba ki pulit ki la ïoh ban kurup ïa ki na katei ka kali. Ki pulit jong ka Birbhum ki la pynlong ïa ka jingtohkit.
Ha kaba ïadei bad kane ka jingjia, ym pat kem ïano ïano ruh haduh mynta.
Ha u Naitung jong u snem ba la leit, ka kynhun West Bengal Special Task Force ka la pynlong ïa ka jingleit khynra ha ka thaiñ Mahammad Bazaar kaba don ha Birbhum bad ki la lap ïa ka Pick-up Van, ha kaba la pynshisha ba kane ka kali ka la kit ïa 81,000 tylli ki bom pynbthei.
Ki la don kumba lai ngut ki briew kiba la shahkem ha kaba ïadei bad kane ka jingjia ha kaba mynta kine ki dang shah tohkit bniah.
Ki pulit ki la pynshisha da kaba ong ba ki runar ki la thmu ban pynbthei bom, hynrei la lah ban pynpulom noh ïa ka jingthmu jong ki.
Hadien ba la lap ïa kiba bun ki tiar pynbthei, ka tnat ki kam pohïing jong ka sorkar kmie ka la hukum ïa ka kynhun NIA ban pynlong ïa ka jingtohkit.
Hadien ba la don ka jingtohkit, ka kynhun NIA ka la ïoh ban kem ïa san ngut ki briew kiba la donkti ha ka jingjia bad ka jingtohkit jong ka kynhun NIA ka dang ïai bteng haduh mynta.
