Lucknow, ïaïong:
U runar uba shyrkhei ïa uba la tip kyrteng kum u Atiq Ahmed um shym la ïoh jingbit na ka ïingbishar ha kaba ïadei bad ka jingthmu jong u ban leit ha ka sngi leh burom khatduh ïa ka met jong u khun jong u u Asad, uba la shah pynïap ha ka jingïasiat bad ka kynhun Uttar Pradesh Special Task Force (STF) ha Jhansi.
Uwei pat uba la shah kynnoh donkti ha ka jingjia, u Ghulam, ruh u la shah pynïap ha ka jingïasiat ba la lamkhmat da u Deputy SP Navendu bad u Deputy SP Vimal.
Ïa ka metïap jong u Asad la kit ha ka kali kit nongpang hadien ba u la shah pynïap ha ka jingïasiat kaba markylliang bad ka kynhun ki pulit.
Ki pulit ki la pynbna ïa ka buskit kaba T. 5 lak na ka bynta kino kino ki briew kiba lah ban ai jingtip ei ei shaphang u Asad bad u Ghulam ïa kiba la shah thwet halor ka jingjia jong ka jingshah pynïap jong u Umesh Pal. Ka longïing jong u Atiq Ahmed ka la shah khmih bniah bad shah buddien ha ki pulit jong ka Uttar Pradesh ha ki 10 snem ba la leit.
Katkum ka kaiphot ba dang ïoh shen, la ong ba ka Shaista Parveen, kaba dei ka kurim jong u Atiq Ahmed ka la thmu ban leit aiti ïalade ha kti jong ka aiñ. Kan sa leit ban aiti ïalade ha ka ïingbishar na ka bynta ban ïoh don bynta ha ka jingleh burom khatduh ïa ka met jong u khun jong ka u Asad.
