Kolkata, ïaïong:
Ka kynhun Central Bureau of Investigation (CBI) ka la wanrah shuh sa 7 ngut ki ophisar na kiwei ki jylla sha Bengal na ka bynta ban nang pynkhlaiñ shuh shuh ïa ka jingtohkit ha kaba ïadei bad ka jingbamsap kaba la mih na ka jingthung kam ha ka tnat pule puthi, la ïathuh u heh jong ka kynhun tohkit.
Kine ki ophisar ki kynthup ïa uba na ka Anti-Corruption Branch ha Delhi, lai ngut ki Deputy Superintendent na Visakhapatnam, Ranchi bad Bhubaneswar, arngut ki Inspector na Visakhapatnam bad Bhopal bad u Sub-Inspector na Dhanbad.
Kine kin sa sah da kumba ar bnai na ka bynta ban ïarap ïa ki para dkhot jong ki, la ïathuh u heh jong ka kynhun CBI.
Kane ka jingpyntreikam ka la long hadien ba ki la ïai mih ki jingkynthoh na ki ar ngut ki nongbishar jong ka Calcutta High Court kiba kynthup ïa u Abhijit Gangopadhyay bad u Biswajit Basu, kiba la don bynta ban bishar halor ka jingdon jong ka kam basap ha kaba ïadei bad ka jingthung kam beaiñ.
Ki la ong ba ha ka por ba la don ki katto katne ki jingbishar la ong ba ka jingtohkit jong ka kynhun CBI ka sahteng bad ka duna ha ka rukom pyntreikam.
Ha ka 31 tarik, Kyllalyngkot, u Justice Gangopadhyay, uba la hukum ïa ka kynhun CBI ba kan pynlong ïa ka jingtohkit ha u Jymmang jong u snem ba la lah, ka la weng noh ïa u ophisar na ka kynhun tohkit kaba kyrpang.
U nongbishar u la ong ba ka jingpyntreikam ha ka jingtohkit ka la long kaba suki palat bad ong ïa u Somnath Biswas, uba long u ophisar ba u la long leh nohei.
Ha u Jymmang jong u snem 2022, u Justice Gangopadhyay u la hukum ïa ka kynhun CBI ba kan tohkit ha kaba ïadei bad ka jingthung kam ïa ki nongtrei ki bym dei ha ka kam hikai kiba dei jong ka (Group C bad D) bad jong ki nonghikai da ka West Bengal School Service Commission (SSC) bad West Bengal Board of Secondary Education hapdeng u snem 2014 bad 2021.
Ka jingthung kam ïa kine ki briew ka la long da kaba shu pynbam tyngka kaba la long naduh T. 5 lak haduh T. 15 lak tang na ka bynta ban ïoh ïa ka kam hadien ba kim lah ne jop ha ki Selection Test.
Ka kynhun Enforcement Directorate (ED), kaba la pynlong ar bynta ka jingtohkit, ka la kem ïa u Myntri ba dei khmih ïa ka tnat pule-puthi u Partha Chatterjee bad ïa ka nongïarap ba ïajan jong u ka Arpita Mukherjee ha ka 23 tarik, Naitung jong u snem ba la lah.
Ka Myntri Rangbah jong ka jylla ka Mamata Banerjee ka la weng noh ïa u Chatterjee na ka sorkar bad ka la weng kam ruh ïa u na ka seng jong ka, ka Trinamool Congress (TMC).
Ki arngut ki nongbishar ki la pynïanujor hapdeng ka jingtreikam jong ka kynhun CBI bad ED, ha kaba la ong ba kane mynta ka la kham trei bha. U MLA jong ka seng TMC bad u President barim jong ka Primary Education Board, u Manik Bhattacharya, sa uwei pat uba la shah kynnoh donkti ha kane kajuh ka kam bamsap u la shahkem ha ka kynhun ED ha ka 11 tarik, Risaw jong u snem ba la lah.
U Chatterjee, ka Mukherjee, u Bhattacharya bad kiba bun ki heh barim jong ka tnat ka koit ka khiah ki la paw kyrteng ha ka jingmudui ba la buh da ka kynhun ED.
