Lucknow, ïaïong:
Ka kynhun Enforcement Directorate ka la kurup noh ïa ki jingdon jingem kiba la kot sha ka T. 100 klur bad ka pisa kaba T. 85 lak kaba dei jong u Atiq Ahmed uwei na ki runar bashyrkhei uba la kylla long u riewsaiñ pyrthei bad jong ki nongïarap jong u.
Nalor kane, ka kynhun ED ka la ïoh ruh ban kurup ïa ki jingdeng ksiar kaba la kot sha ka T. 2.85 klur bad ki lyngkhot ksiar kiba la kot sha ka T. 60 lak.
Kane ka jingkurup ïa kine ki jingdon jingem ka la long hadien ba la pynlong ïa ka jingleit khynra ha ki 15 tylli ki jaka kiba don ka jingïadei bad u Atiq bad kumjuh bad ki nongïarap jong u, kiba kynthup ïa u Sita Ram Shukla, Khalid Jafar, Asif Jafri, C A Shabeeh Akhtar, Saulat Haneef, Sanjeev Agarwal, Deepak Bhargava bad ka kurim jong u Atiq ka Shaishta Praveen.
Kumba la ïathuh ki heh jong ka kynhun ED, la ong ba ka jingpynlong ïa ka jingkhyra ka la sdang ha ka 13 tarik Ïaïong bad ka la kut ha ka sngi Thohdieng.
Ki heh ba dei khmih shuh shuh ki la ong ba nalor kitei ki jingdon jingem ba la ïoh ban kurup la ïoh ruh ban kurup ïa ki kot ki sla donkam, ki tiar pyndonkam, kiba kynthup ïa ki tiar ilektrik, 30 tylli ki Mobile Phone, ki Laptop bad kiba bun ki Pen Drive bad ki Computer ruh.
Ka kynhun tohkit, ka la ong ba ha ka por ba la pynlong ïa ka jingleit khynra, baroh ar, kata ki jingdon jingem ha ki jaka sah bad ha ki jaka rep kiba don ha ka kyrteng jong u Atiq la kurup noh.
Ïa ki kot ki sla la lap na ka ïingsah jong u muktiar u Khan Saulat Haneef. Kawei ka jaka kaba la ïoh ha u snem 2013 bad kaba don ka jingheh kaba 5,900 sqm ka dei kaba don ha ka shnong kaba ha Lucknow. Ka kynhun ED ka la ïathuh ba ka dor jong kane ka jaka kumba la kheiñ da ka sorkar ka la long T. 47 lak.
Ha kaba ïadei bad ka jingleh jong u ïa ki kam pyntriem da kaba byrngem, u Atiq u la ïoh ban klop pisa na kane ka jaka da T. 29 lak. Katkum ki kot ki sla ba la ïoh ban kurup, la ong ba kam shym la don ka jingbatai bniah shaphang ka jingsiew sha u nongdie. Kine ki la pynpaw ba kane ka jaka ka dei kaba la ïoh da ka jingdawa jong u Atiq.
Da kaba pyndonkam da ka bor ha ka por ba u la don ha ka kam saiñ pyrthei, u la lah ban ïoh ïa ka jaka kaba don ha Gomtinagar, Lucknow.
Ki jingdon jingem ne ki jaka da kumba 100 tylli kiba u Atiq u la ïoh ka la long hapdeng u snem 2011-12 haduh 2016-17. Kine ki jingdon jingem baroh ki la shah kurup lut, la ïathuh ki heh jong ka kynhun ED. Kine ki jingdon jingem ki dei kiba don ha Prayaraj bad ha kiwei pat ki jaka. Kine ki jaka bad ki jingdon jingem ki dei kiba don ha ka kyrteng jong ki nongïarap jong u Atiq bad kiwei pat ki briew.
