Bhubaneswar, ïaïong:
Haba ka jingïakynad ka la sdang biang ha Sambalpur kaba don ha Odisha, ki bor pynïaid distrik ki la pyntreikam noh da ka Curfew kaba khlem buh por. Hadien ba la ïoh jingtip ba ki la don ki kynrum kynram kiba la mih, u Sadar Sub-Collector jong ka Sambalpur u Pravash Chandra Dandasena u la pyntreikam noh da ka Curfew ha ka miet jong ka sngi Thohdieng.
“Ïa ka Curfew hapoh ka jingtreikam jong ka kyndon 144 (1) CrPC la dep rai ban pyntreikam ha kaba la khang pyrshah bym dei ban don briew la ka long marwei ne da ka kynhun ki ban mih na ki ïing jong ki khnang ban lah ban wanrah ïa ka shongsuk shongsaiñ ha ka thaiñ,” la ong ka hukum.
Ïa ka Curfew la pyntreikam ha ki 6 tylli ki thaiñ kiba hap hapoh ka jingkhmih jong ki pulit jong ka Sambalpur, Dhanupali, Khetrajpur, Ainthapali, Bareipali bad Sadara naduh ba la dep ban pynbna halor ka jingpyntreikam ïa ka kyndon bad haduh ban da pynbna da kumwei pat. Ym shym la shah ïano ïano ruh ban mih shabar ïing ha ka por ba don ka Curfew. Ha kaba ïadei bad kane, ki bor pynïaid distrik ki la ai jingbit ïa ki briew ba kin mih shabar tang ha kaba ïadei bad ka jingpynïoh ïa ki jingdonkam ba man ka sngi jong ki ha ka por 8 mynstep haduh ka por 10 baje mynstep bad naduh 3.30 janmiet haduh 5.30 janmiet.
“La ong ba kane ka jingpyntreikam pyrkhing ka long ruh shi bynta pyrshah ïa ki nongpynkheiñ aiñ kiba thmu ban wanrah ïa ki jingkulmar,” la ong u Sub-Collector. Hashwa kane, ka sorkar jylla ka la dep ban pynduh treikam shipor ïa ka Internet ha baroh kawei ka distrik na ka bynta 48 kynta ha ka sngi Palei. Katkum ka jingïathuh jong u DIG (North Central Range) u Brijesh Kumar Rai la ong ba ki la don kumba katto katne tylli ki dukan kiba la shah thang bad shah pynjulor ha ka miet jong ka sngi Thohdieng.
Kumta ki bor sorkar ki la rai ban pynjari noh da ka Curfew khnang ban lah ban khanglad ïa ki jingkulmar bad ban pynphai ïa ka shongsuk shongsaiñ ha ka thaiñ khamtam hadien ba dang shu dep jia shen ka jingïakynad ha ka nongbah.
