New Delhi, ïaïong:
U Myntri jong ka sorkar kmie uba dei khmih ïa ka tnat ki kam pohïing u Amit Shah u la lah ban khmih bniah bad pyntreikam ha ki 7 bnai ha kaba ïadei bad ka jinglah ban pyntroiñ ïa ki nongïalam jong ki kynhun runar kiba kynthup ïa u Deepak Boxer, bad ki kynhun pyntriem jong ki lehnoh ka Pakistan, la ong ki heh ba dei khmih halor kane ka bynta.
Haduh mynta, ki la don kumba 300 ngut ki snar bad ki runar kiba ju leh ïa ki kam beaiñ kiba la shahkem ha ki pulit jong ka Delhi bad ha ka kynhun National Investigation Agency (NIA) kum shi bynta ban pyntroiñ ïa ka kynhun jong ki,la bynrap shuh shuh ki heh ba dei khmih.
“U Myntri ka tnat ki kam pohïing u la lamkhmat ha kaba ïadei bad ka jingpyntroiñ ïa ki kynhun jong ki runar kiba treikam hapoh bad ha ki bynta jong ka Delhi-NCR bad kiwei pat ki bynta jong ka ri. Ha ka por ba la don ka jingïalang ban khmih bniah halor kane ka bynta, la ong ba u la ai ka jingkyntu kynpham ïa ki kynhun ba kyrpang jong ki pulit ka Delhi bad ki kynhun tohkit jong ka sorkar kmie ba ki dei ban ïaid shakhmat ha ka ban ïakhun pyrshah bad buddien ïa ki kynhun runar bad ki ktem jong ki kynhun pyntriem ki lehnoh kiba ha ki bynta ba bun jong ka ri bad kumjuh kiba nabar ri kynthup ïa kiba na Pakistan, Canada, Malaysia, Australia, US bad kiwei pat. Kane ka jingïai bteng ban pyntreikam ha ka ban buddien halor ka jingdon jong ki runar bad ki riewpyntriem, ka la pynlong ban ïohkem ïa kiba bun ki runar kiba shyrkhei ha kine ki hynriew-hynñiew bnai ba la leit,” la ong u heh sorkar ha ka North Block, ïa u bym shym kwah ban pynpaw kyrteng.
Ki kynhun treikam jong ki pulit ka Delhi kum ka Special Cell bad ka Crime Branch ki la ïoh ban kem ïa 51 ngut ki snar nongïalam jong ki kynhun ba la ïatreilang hapdeng ki runar bad ki lehnoh, bad 217 ngut ki runar kiba pdeng kiba la shahkem ha kine ki 7 bnai ba la leit, nalor kane la ïoh ruh ban kurup ïa kiba bun ki tiar siat bad pynbthei, kynthup ki AK-47, MP-5, ki Grenade Launcher, ki bom kawang kti bad kiwei pat, la ïathuh shuh shuh u heh sorkar.
“Kane ka jingshahkem jong ki 51 ngut ki snar jong ka kynhun runar ka la long ka jingpynjem khnap ïa ka kynhun runar jong u Harwinder Singh Rinda uba na Pakistan bad u Lakbhir Singh Landa na Canada bad u Arshdeep Singh ba la tip ruh da ka kyrteng kum u Arsh Dala. Ki pulit jong ka Delhi ki la ai ka jingïarap ïa ki pulit jong baroh ki jylla ba marjan da kaba kem ïa ki runar kiba shyrkhei,” la ong u heh sorkar.
Ki pulit kiba don ha ka jylla kum ha Punjab, Haryana, Rajasthan, Uttar Pradesh bad kiwei pat, ki la pynlong ïa ka jingleit khynra na ka por sha ka por ha kine ki 6 bnai ba la leit kum shi bynta ban pyntroiñ ïa ki kynhun runar, ha kaba katkum ka jingmudui jong ka kynhun NIA ïa kaba la buh ha u bnai ba la lah, la ong ba ka la pynpaw ba ki la don ki rukom pyntreikam ha kaba la ïohi ha Mumbai ha ki snem 1990 ha kaba ki nongïarap jong ki lehnoh ki la don ka jingïadei bad ki karkhana ba pynmih ïa ki sur jingrwai bad ki phlim, ki nongrwai, ki nongïalehkai Kabbadi bad ki nongïasaid aiñ, bad kine ki la leh ïa ki kam pynïap briew da kaba suk.
Nalor kane, ka kynhun NIA ka la ïoh ban kem ïa 27 ngut ki runar bad ki nongïarap jong ki ha ki 6 bnai ba la leit hadien ba la dep ban pynlong ïa ka jingleit khynra ha palat 200 tylli ki jaka bad ki jaka rieh tngen ha ki san sien ha ki 7 tylli ki jylla.
Ka la ïoh ruh ban kurup ïa 13 tylli ki jingdon jingem, ïa 95 tylli ki Bank Accounts bad phah ruh ïa ki 20 tylli ki jingthoh kiba long pyrshah ïa ki kynhun runar bad kumjuh ïa ki kynhun lehnoh.
