New Delhi, ïaïong:
Uwei u shipai hynnin ka sngi u la shahkem na Bathinda Military Station kaba don ha Punjab ha kaba ïadei bad ka jingjia kaba dang shu jia shen halor ka jingshah siat ïap jong ki saw ngut ki shipai ha ka por ba ki dang ïohthiah, la ïathuh ka tyllong khubor kaba la wan na ki pulit ka Punjab.
Une uba la shahkem u dei uba la tip kyrteng kum u Mohan Desai, haba u la shah tohkit u la phla ba u la leh ïa katei ka kam bad u la ïathuh ba ka daw halor ka jingsiat jong u ïa kitei ki para shipai ka la long na ka daw shimet. Ki la don kumba saw ngut ki shipai kiba la shah tohkit bniah ha kaba ïadei bad ka jingjia shah siat, la ïathuh shuh shuh ki pulit.
Ki pulit ki la buh da ka jingujor pyrshah ïa ki arngut ki briew ki bym shym la lah ban ithuh ha kaba ïadei bad ka jingjia shah siat jong ki shipai kumba la ïathuh da u Major Ashutosh Shukla, uwei na ki nongsakhi ha katei ka jingjia.
Katkum ka jingmudui ejahar la ong ba ki saw ngut ki shipai kiba la shah siat ïap ki dei kiba la tip kyrteng kum u Sagar, Kamlesh, Santosh, bad u Yogesh.
Kine ki dei ki shipai jong ka kynhun kieng atiar jong ka tnat shipai. Ka jingshah pynïap jong kine ki shipai kaba la jia ha ka 12 tarik, Ïaïong ka la wanrah ïa shibun ki jingkylli ha kaba ïadei bad ka rukom pyntreikam na ka bynta ka jingai jingshngaiñ ha ka jylla, khamtam naduh ba la jia ki jingjia kumba la suba ba ka la don ka jingleit thwet jur ïa u nongïalap niam jong ki Sikh u Amritpal Singh uba la phet rieh na kti jong ki pulit bad jingpyrshah jur ïa ka seng jong u ka ‘Waris Punjab Se’.
Hadien ba la ïohkem ïa utei u shipai, la shem ba katei ka jingshah pynïap jong kitei ki shipai kam don bynta ei ei bad u Singh.
Kane ka jingjia shah siat jong kitei ki shipai ka la pynsuba sniew hadien ba la jah ka suloi INSAS bad 28 song ki kuli, ha kaba la suba jur ba kine ki tiar siat kiba la jah da kumba ar sngi ki dei kiba la pyndonkam ha ka jingjia.
Hadien la lap noh ïa kine ki tiar siat da ki shipai, ha kaba la suba ba ki la don kumba katto katne ngut ki briew kiba la donkti ha ka jingjia.
Katkum ka jingmudui ejahar, la ong ba ka jingsiat ka la jia ha ka por 4:30 mynstep, bad ki la don kumba katto katne ngut ki briew kiba la kah durkhmat kiba phong da ki Kurta-Pyjama.
Uwei napdeng kine ki briew kiba la kah durkhmat u la bat ïa ka suloi INSAS, katba uwei pat u la rah da u sdie, la ong ka jingujor, ha kaba la bynrap shuh shuh da kaba ong ba kine ki briew hadien ba ki la dep ban leh ïa kane ka kam ki la phet noh sha ka khlaw kaba don ha marjan jong katei ka jaka treikam jong ki shipai.
Kine ki saw ngut ki shipai kiba la shah siat ïap ki dei kiba dang don hapdeng ka rta kaba 20 snem, ïa kine la lap ba ki la thiah ha ka jinglyngkien jong ka snam ha ki kamra jong ki. Kumba la ïathuh ka tyllong khubor, la ong ba u Myntri ka tnat ïada ri, u Rajnath Singh u la ïoh ïa ka jingtip kaba bniah halor kane ka jingjia na u Army Chief General Manoj Pandey.
