New Delhi, ïaïong:
U Myntri Rangbah jong ka Delhi u Arvind Kejriwal ha ka sngi U Blei u la shah kylli jingkylli da palat 9 kynta ha ka kynhun Central Bureau of Investigation (CBI) ha kaba ïadei bad ka jingjia jong ka jingpyntreikam ha ka tnat Excise.
U Kejriwal u la pynshisha da kaba ong ba u la shah kylli da 56 tylli ki jingkylli. Une u nong-aibuit aibor jong ka seng AAP u la shah kylli jingkylli namar ba u la long u nongsakhi ha kaba ïadei bad ka jingjia ha kaba ki nongtohkit ki la ong ba ka jingdonkti ka lah ba long na ka jingleh jingkam ban ai jingmyntoi na ka rukom siew ïa ka khajna halor ka kyiad.
Ha kaba ïadei bad kane, u Kejriwal um shym la shah khot hajir hashwa kane. “Nga kwah ban ong ba baroh kaei kaba la mih na ka jingjia ha ka tnat Excise ka dei kaba shu thok. Kim shym la don kino kino ki sakhi ban pyni ba ka seng AAP ka leh ïa kaba bakla. Kane ka dei tang ka kam jaboh ba la leh ha ka kam saiñ pyrthei,” u la ong ha ka jingïakren bad ki nongthoh khubor hadien ka jingshah tohkit jong u da palat 9 kynta.
U la pynpaw ka jingsngewnguh ïa ki heh jong ka kynhun tohkit kiba la ïatreilang bad ong, “Ka rukom kylli jingkylli jong ki ka long ha ka rukom kumba ïakren paralok. Nga la jubab lut ïa baroh ki jingkylli.”
“Ka kynhun CBI ka la kylli da kumba 56 tylli ki jingkylli ha kaba ïadei bad ka jingtreikam ha ka tnat Excise, kynthup mynno bad balei la sdang ïa katei ka jingpyntreikam,” u la bynrap.
U Kejriwal u la poi ha ka jaka treikam jong ka kynhun ha ka por 11 baje mynstep da ka SUV kaba u ju pyndonkam ban beh ha ki kam ophis jong u.
Kumba la ïathuh ki heh jong ka kynhun tohkit bniah, la ong ba u Kejriwal u la shah kylli jingkylli ha ka jaka treikam kaba don ha ka mala kaba ar jong ka Anti-Corruption Branch.
“Ka jingshida ka dei kaba ngi ngeit. Ngi don ka mon ban ïap hynrei ngin ym kylla ne lyndet na ka jingshida. Ki la leh ïa kine baroh tang kumno ban pynjahburom ïa ngi bad ka jingbha jong ngi bad kumjuh ban pyrshah ïa ki kam pynroi ba ngi wan rah. Ngi la don ha ka seng kaba paw ha baroh kawei ka ri, namar kane ka daw ki la leh ïa kine kiei kiei baroh tang kumno ban khanglad ïa ngi,” la ong u Kejriwal ha ka jingïakren bad ki nongthoh khubor.
Ha u bnai ba la lah, u Symbud Myntri Rangbah barim ka Delhi u Manish Sisodia u la shahkem ha ka jingshah kynnoh donkti ha kajuh ka jingjia.
Ha kawei pat ka liang, ki nongbud jong ka seng AAP ki la pynlong da ka jingïakhih hajan ka jaka treikam jong ka kynhun CBI.
Ki nongïalam jong ka seng AAP kiba kynthup ïa u Raghav Chadha, Sanjay Singh, Atishi, Bhagwant Mann napdeng kiba bun kiwei pat ki nongïalam ki la shahkem hashwa ha ki pulit.
