Hyderabad, ïaïong:
Ka sorkar Telangana ka la ïai bteng ban wad ki lad ki lynti ha kaba ïadei bad ka jingthmu na ka bynta ban pynbiang ïa ki jaka pule jong ki Medical College la ïaleh ban wad bad jurip bniah ïa ki jaka na ka bynta ban shna ïa kine ki jaka ai jinghikai. Ki heh jong ka tnat ka koit ka khiah ki la khmih lynti ba kane ka jing-angnud kan urlong shisha khamtam hadien ba la dep ban wanrah ïa ka mang tyngka kaba T. 1000 klur na ka bynta ban buh ïa ki Medical College ha man kawei pa kawei ka distrik.
U Myntri ka tnat pla tyngka u T Harish Rao ha ka jingai jingkren jong u ha Telangana Assembly u la ong ba ka jylla ka la don ïa ka thong na ka bynta ban buh la kumno kumno kawei ka Medical College haman kawei pa kawei ka distrik haduh u 2023.
“U Myntri Rangbah u la rai ba baroh ki distrik jong ka jylla kin sa don ïa ki Government Medical Colleges. Ïa kine wanrah ïa 8 tylli ki Medical College kiba thymmai ha Asifabad, Bhupalpally, Vikarabad, Sircilla, Jangaon, Kamareddy, Karimnagar bad Khammam,” la pynbna u Harish Rao, uba long ruh u Myntri jong ka tnat ka koit ka khiah.
U la bynrap shuh shuh da kaba ong ba ha une u snem ba mynta, kata u 2023, kin sa don sa kumba 8 tylli kiwei pat ki Medical College ha Medak, Medchal, Rangareddy, Mulugu, Warangal, Narayanpet, Gadwal bad Yadadri.
Nalor kine, ki la don lypa 8 tylli ïa kiba la dep ban mang ha Mancherial, Ramagundam, Jagtial, Wanaparthy, Nagarkurnool, Mahbubabad, Kothagudem bad Sangreddy bad kine kin sa treikam ha u snem ban wan, la bynrap shuh shuh u Myntri ka pla tyngka.
U la ong ba ïa kine ki kolej la lah ban wanrah namar ka jingthaw ïa ka jylla Telangana hapoh ka jingsynshar jong u Myntri Rangbah u K Chandrashekhar Rao.
“Ki la don tang kumba 3 tylli ki Government Medical College kiba la mih ha ka thaiñ Telangana ha ka por jong ka jingsynshar da 60 snem jong ka Andhra Pradesh ha ka por bym pat phiah jylla ïa ka. Ïa ka Osmania and Gandhi Hospital la wanrah wat hashwa ka jylla kaba dang long kawei. Ka sorkar TRS ha ki 7 snem shiteng ka la pynmih ïa 12 tylli ki Medical College ha kaba da kine, ka la nang pynbun shuh shuh sha ki 17 tylli,” u la ong.
U Myntri ka tnat pla tyngka u la pynbna ruh ban buh sa kumba 2000 tylli ki jingthiah nongpang ha Nizam’s Institute of Medical Science ha kaba da kane kin sa don kumba 3489 tylli ki jingthiah ha ka jaka ai jingsumar.
Da kane kin sa don baroh 6000 tylli ki jingthiah hapoh bad ha ki bynta jong ka Hyderabad kumba long ha u Jymmang jong u snem 2021, ha kaba ka sorkar ka la pynbna ba ka la thmu ban buh ia 4 tylli ki Hospital ha Gachibowli, LB Nagar, Alwal bad Erragadda.
Ïa kine ki jaka pule yn sa tip kyllum kum ka Telangana Institute of Medical Sciences (TIMS) ka ban sa don kumba 4000 tylli ki jingthiah jong ki nongpang.
Ka sorkar nangne shakhmat kan sa ïaleh ban wanrah ki lad ki lynti ba bun khamtam ha ka ban plielad ïa ki samla pule kiba don ka jingthrang ban bteng ïa ki jingpule ba kham shalor khamtam ha ka Medical ka ban ai jingmyntoi ïa kiba bun.
