Mumbai, ïaïong:
U MP jong ka seng Shiv Sena (UBT) u Sanjay Raut ha ka Lah Sngi U Blei u la ong ba u Ajit Pawar u lah ban ym ieh ïa ka seng NCP bad u la pynkynmaw da kaba ong ba u Sharad Pawar u la ong ïa u ha ka taïew ba la lah ba ki la don kumba katto katne ngut ki nongïalam jong ka seng kiba lah ban mih noh na ka seng jong u tang namar ka jingshah pynbor.
“Ha ka jingïakynduh bad u Thackeray, u Pawar u la ïakren ha kaba ïadei bad ki jingshah pynbor bad ki jingshah byrngem ïa kiba la leh da ki kynhun tohkit jong ka sorkar kmie kum ka Enforcement Directorate (ED), ka Central Bureau of Investigation [CBI] bad ki kynhun pulit kiba la thmu ban pynpait ïa ka seng NCP kumba long ïa ka seng Shiv Sena. U Pawar u la ong ba katba ki la don kumba katto katne ngut ki briew kiba lah ban iehnoh ïa ka seng jong u tang namar ba ki shah pynbor, hynrei kata ka shong ha ka mon bad ka rai jong ki. U President jong ka seng NCP u la ong da kaba shai ba ka seng NCP kum ka seng saiñ pyrthei kaba skhem jingmut kan ym ieh ne mih noh na ka kynhun synrop MVA. Nga la thoh kumjuh ha ka khubor Saamana ruh,” u la ong.
Ha kaba ïadei bad ka jingai jubab halor ka jingbna khubor ba u Ajit Pawar u la thmu ban leit pynïasoh bad ka seng BJP, u nongaiktien jong ka kynhun jong u Uddhav u la pynpaw ba u la donlang ha ka jingïalang kaba la long ha Nagpur.
“Ngi la ïakren sani bha ha ka jingïakynduh. Ngi la leit phai sha Mumbai ha kajuh ka liengsuiñ. Ngam shym la pyrkhat ba un sa ieh ïa ka seng NCP bad ba un sa mih bad ïaid da kawei pat ka lynti,” la ong u Raut.
Ka la don ka jingkhmih lynti ba u Ajit Pawar, uba la long teng u dkhot ba pyrshah jong ka seng NCP bad pynïasoh bad ka seng BJP na ka bynta ban long u Symbud Myntri Rangbah, u la ïakynduh ïa u Myntri Rangbahduh u Narendra Modi bad ïa u Myntri ka tnat ki kam pohïing u Amit Shah.
U la pynshisha ruh da kaba ong ba ka jingïadei hapdeng ka seng Shiv Sena (UBT) bad ka NCP ka long kaba biang eh.
