New Delhi, ïaïong:
Ki la don kumba 31 ngut ki ‘riewlum na Karnataka kiba la don ha ka nongbah El-Fasher ha Sudan ha kum kane ka por ba ka la don ka thma hapdeng ki kynhun shipai ha Africa ha kaba ka la dep lypa ban shim ïa ka jingim jong ki 185 ngut ki briew.
Kine ki briew kiba dang sahkut ha katei ka nongbah ki dei kiba na ka kynhun Hakki Pikki ka kynhun nongshong shnong kaba rit jong ka Karnataka bad ki la shu shong khlem bam khlem dih bad khlem um naduh ba la sdang ka jingïakynad ha kane ka taïew.
Ka Karnataka State Disaster Management Authority (KSDMA) ka la batai shai ïa ka Ministry of External Affairs (MEA) shaphang ka jingjia bad ka la ïakren ruh bad ka Indian Embassy ha Sudan na ka bynta ban pynsted ha ki rukom pyntreikam kiba ïadei bad ka jingpyllait im ïa kine ki briew.
“Ngi la ïoh jingtip ba ka kynhun jong ki 31 ngut ki briew kiba dei na Karnataka ki la sahkut ha Sudan. Ngi la pyntip sha ka MEA shaphang kane. Ngi la bthah ïa katei ka kynhun ba ki la dei ban sah ha ka jaka kaba ki don bad ba kim dei ban mih shabar. Ngi la bthah ruh a katei ka kynhun ba ka la dei ban bud ïa ki kyndon jong ka Indian embassy ha Sudan. Kumba ka long mynta, la ong ba ki briew kiba la sahkut ki dei ban sah ha ka jaka kaba ki don bad ba kim dei ban mih shabar. Ka MEA ka la ïoh jingtip halor ka jingjia bad ka la sdang ban leh ei ei halor jong ka,” la ong u Dr Manoj Rajan, Commissioner, KSDMA.
Ha kaba ïadei bad kane, la i kumba ka seng Congress ka la ïaleh ban pynlong kam saiñ pyrthei ha kaba ïadei bad kane ka bynta khamtam haba lajan sdang ka ilekshon Assembly ha u bnai ban wan ha ka jylla.
U heh nongïalam jong ka seng u la don ka jingkyrmen ba u Siddaramaiah u la buh ka jingkyrpad ïa u Myntri Rangbahduh u Narendra Modi, u Myntri ka sorkar kmie uba dei khmih ïa ka tnat ki kam pohïing bad ka MEA na ka bynta ban tuklar halor kane ka jingsahkut jong kine ki briew.
U Siddaramaiah ha ka jingphah jingthoh lyngba ka Twitter u la ong: “La ïoh jingtip ba ki la don kumba 31 ngut ki briew na Karnataka kiba dei jong ka kynhun ‘riewlum Hakki Pikki, kiba la sahkut ha Sudan ha kaba ki la ïakynduh jingeh na ka jingdon jong ka thma pohïing. Nga buh ka jingkyrpad ïa ka PMO, u Myntri Rangbahduh, u Narendramodi, Myntri ka tnat ki kam pohïing, ka MEA bad ïa u Myntri Rangbah ka jylla u Basavaraj Bommai ba ki la dei ban shim ka jingtuklar halor kane ka bynta khnang ban pyntikna ha ka ban pynphai suk ïa kine ki briew sha kane ka ri.”
“Ki Hakki Pikkis ha Sudan ki la sahkut khlem ïoh jingbam naduh ki khyndiat sngi ba la leit bad ka sorkar kam pat leh ei ei ha kaba ïadei bad ka jingwan pynphai ïa ki. Ka sorkar India ka la dei ban ïakren kyrkieh bad ki heh sorkar jong katei ka ri na ka bynta ban pynïoh ka jingshngaiñ bad ka bha ka miat jong ki Hakki Pikkis,” u la bynrap.
U nongaiktien jong ka seng Congress u Randeep Singh Surjewala u la ïaid shakhmat ha kaba ïadei bad ki jingkdew kti jong u ïa kiwei pat bad u la shim kabu na ka bynta ban kynthoh jur ïa ka sorkar kmie bad ïa ka sorkar Karnataka, ha kaba ki la kynnoh ba la buh ïa kine ki riewlum ha ka jingma.
