Ahmedabad, ïaïong:
Ha kaba ïadei bad ka mukotduma jong ka jingpynjah burom halor ka jingkren pyrshah ïa ka jait “Modi”, ka Surat Sessions Court ka la kyntait ïa ka jingkyrpad jong u Rahul Gandhi ha kaba ïadei bad ka jingpynsangeh shwa ïa ka rai pynrem halor kane mukotduma.
Ha ka Lah Sngi U Blei jong ka taïew ba la lah, u Additional Sessions Judge u R P Mogera u la ong ba ka hukum halor ka rai ban pynrem ïa u kan sa long ha ka 20 tarik, Ïaïong.
U Rahul Gandhi mynta u lah ban phah ka jingkyrpad ha ka High Court ha Gujarat, ka Sessions Court ka la pyllait jamin bad pynkynriah por ha kaba ïadei bad ka rai pynrem ban set patok ar snem ïa u, ïa kaba la pyntreikam da ka Mmetropolitan Magistrate Court ha ka 23 tarik, Lber, haduh ban da don ka jingkyrpad jong u ban dawa ha ka ban pynsangeh shwa ïa ka rai pynrem.
U Gandhi u la shah rai pynrem haba u la kren ïa ki kyntien kiba ong, “Kumno ka lah ban long ba baroh ki nongtuh ki dei kiba don ïa ka jait Modi”, ha ka por ba u la ai jingkren ha ka jingïalap ilekshon kaba la long ha u snem 2019. Hadien ka jingshah rai pynrem jong u, u Rahul Gandhi u la duhnoh ïa ka hok ban ïohlong dkhot ha Lok Sabha, ha kaba kane ka la pynlong ïa ki seng ka liang pyrshah ba kin kynthoh jur ïa ka sorkar.
