Mumbai, ïaïong:
Ka Brihanmumbai Municipal Corporation (BMC) ka la ithuh ïa kumba 217 tylli ki ïing kiba buh jingma bad la phah ruh da ki shithi sha ki trai jong kine ki ïing, hashwa ban wan ka aïom lyiur.
Hashwa ban wan ka aïom lyiur, ka Brihanmumbai Municipal Corporation (BMC) ka la ithuh ïa kumba 217 tylli ki ïing kiba buh jingma bad la phah ruh ïa ki shithi maham hashwa ban pynpra noh ïa ki.
Kane ka jingdon jong kine ki ïing ka kham duna haba ïanujor bad jong u snem ba la lah ha kaba ki la don kumba 489 tylli ki ïing kiba la tor bad bym idon jingshngaiñ shuh ïa kiba bun.
Ka K West Ward kaba kynthup ïa ka Andheri, Juhu bad Vile Parle West, ki la paw hakhlieh eh ba ki la long ki ïing ki bym buh jingshngaiñ shuh, ha kaba ki la shah kynthup ha ka kynhun C1, ha kaba ki la don da kumba 29 tylli ha une u snem uba mynta.
Hadien kane la bud da ka H West, kaba kynthup ïa ka Bandra, Khar bad Santacruz West, ha kaba ki la don 22 tylli, katba ka K East Ward, kaba kynthup ïa ka Andheri bad Jogeshwari East, ka la wan balai ha kaba ka la don ïa kumba 21 tylli ki ïing ki bym buh jingshngaiñ shuh.
Na ki 24 tylli ki Ward, ka F North kaba kynthup ïa ka Matunga bad Sion bad ka M East kaba kynthup ïa ka Govandi ki la long ki jaka kiba don tang mar kawei ka ïing ha kaba ki la shah ñiew ba kim don jingshngaiñ shuh na ka bynta ban sah briew.
Kumjuh ha ka thup kyrteng la kynthup ruh ïa ka R North (Dahisar) ha kaba la don kawei ka ïing kaba la tor katba ha C (Marine Lines) la don ar tylli bad ha B (Dongri) bad ha A (Colaba, Fort and Churchgate) ki la don mar lai tylli ki ïing.
Kumba la ïoh jingtip, la ong ba ki briew kiba shong ha ki 110 tylli ki ïing ki la leit pynibor sha ki ïingbishar halor ka rai jong ka BMC.
Ki la don kumba 9 tylli ki mukotduma ïa kiba dang sah bad ka Technical Advisory Committee (TAC) jong ka BMC.
Na ki 29 tylli ki ïing ki bym don jingshngaiñ ha K West, ka BMC ka la lah ban pynkynriah jaka sah tang ïa ki briew kiba na phra tylli ki ïing.
Katkum ka thup ba la wanrah da ki heh ba dei khmih jong ki Ward, la ong ba ki la don kumba 7 tylli ki ïing ïa kiba la ïoh shithi maham bad ki mukotduma jong ki 7 tylli kiwei pat ki dang sah bad ka TAC.
