Kozhikode, ïaïong:
Uwei u nongïalam jong ka kynhun lehnoh Maoist u Ajay Oraon, u la shahkem na kawei ka jaka sah jong ki nongbylla kaba don ha Pantheerankavu jong ka Kozhikode ha ka sngi Ba-ar da ki pulit jong ka Pantheerankavu hadien ba la ïoh jingtip shaphang jong u.
U Ajay u dei u nongshong shnong jong ka Jharkhand bad u la long u Zonal Commander jong ka People’s Liberation Front of India (PLFI), ka kynhun lehnoh jong ki Maoist ïa kaba la seng ha Jharkhand ha u snem 2007.
Ki la don kumba ar tylli ki mukotduma kiba long pyrshah ïa u Ajay ha Jharkhand halor ka jingthang jong u ïa ki tiar pyndonkam kiba don ha ki jaka ba dang don ka jingshna jingshna bad halor ka jingsam jong u ïa ki kot lyngkdop jong ka seng PLFI.
Une uba la shah kynnoh u la shahkem hadien ka jingïoh khubor shaphang ka jingdon jong u ha katei ka jaka na ki pulit ka Jharkhand. Une u lehnoh u la pynlong jaka rieh ha katei ka jaka sah jong ki nongbylla kiba na kiwei pat ki jylla ha Kaimbalam da kumba shi bnai shiteng ha kaba u la leh mynleh kum u nongbylla.
“Hadien u snem 2019, u la leit jngoh ïa ka Kozhikode da kumba saw sien. Utei uba la shah kynnoh u la leit sha Pantheerankavu ha ki shi bnai ba la leit. U la sah hangne ha kaba u la pyndonkam da ka kyrteng thok kum u Ajaykanth, Dhanjay, bad kiwei pat. U Ajay u la shah set patok ruh kumba 11 bnai halor ka jingbuh jong u ïa ki tiar siat,” la ong ki pulit.
Ki pulit jong ka Jharkhand ki la pynlong ka jingleit thwet jur ïa u Ajay kum shi bynta ban pynlong ïa ka jingleit thwet ïa ki lehnoh Maoist ha ka jylla. Ki la lap ïa ka jaka ba u don lyngba ka Mobile Phone sha Kozhikode bad da ka jingïarap jong ki pulit ka Pantheerankavu, la lap ïa u na ka jaka sah jong ki nongbylla ha kaba u la buhrieh ïalade.
U Ajay u la shah tohkit ha ka kynhun jong ki pulit ka Kerala-Jharkhand bad kumjuh ha ka kynhun Central Intelligence Bureau. Ka kynhun jong ki lai ngut ki dkhot jong ki pulit ka Jharkhand ki la poi ha Kozhikode, bad ki pulit jong ka Kerala ki la aiti ïa une uba la shahkem sha ki. Ka kynhun ka dang tohkit bniah la u Ajay u la ïoh jingïarap ne em na ki nongshong shnong ka thaiñ ha ka por ba u la phet rieh na kti jong ki pulit. Kumba la ïathuh bniah, la ong ba une um shym don jingïadei ei ei bad ki lehnoh Maoist ha Kerala.
