Noida, ïaïong:
Ki pulit jong ka Gautam Budh Nagar ki la ïoh ban kem ïa 8 ngut ki runar, kynthup ïa 7 ngut kiba dei nabar ri, ha ka sngi Balang halor ka jingpynbiej bad pynngop jong ki ïa ki kynthei kiba la siew pisa da bun tyngka da kaba long paralok bad ïarap ïa ki lyngba ki Social Media.
Kumba la ïathuh ki nongtohkit, la ong ba ka kynhun jong ki 6 ngut ki shynrang bad arngut ki kynthei ka la pynbiej ïa kumba 600 haduh 700 ngut ha India ha kaba ki la ïoh ban khur da ki lak tyngka ha u snem ba la lah.
Ki heh pulit ki la ong ba ki la don tang arngut ki bar ri ïa kiba la lap ba ki la don ïa ka Visa kaba la treikam bad ai jingbit ïa ki ba kin sah ha India, katba san ngut kiwei pat ki dei kiba la shu sah beaiñ ha kane ka ri.
Katkum ka jingïathuh jong u Shakti Avasthy, uba long u Additional Deputy Commissioner of Police, Noida, u la ong ba kane ka jingjia ka la paw hadien ka jingleit ujor jong kawei ka briew ha ka jaka treikam jong ki pulit ka Sector 20 ha u Nailar jong u snem 2022.
“Katkum ka jingmudui, la ong ba uwei u briew ïa uba la tip kyrteng kum u Morgan u la ïalang paralok bad ka ha ka Instagram bad ong ïa ka ba u dei u heh shipai duriaw uba sah ha United States. Hadien ba u la ïalang paralok bad kane ka briew, u la ong ïa ka ba u la phah kumba katto katne tylli ki jingai sngewbha bad pyni sha ka ïa ka song jong ki. Hadien kane, katei ka briew ka la ïohpdiang ïa ka Call na uwei pat u briew ha kaba u la pynshisha ba u la long u heh ka tnat Custom, ha kaba la ong ïa ka ba ka la dei ban siew T. 2.5 lak ka pisa ha kaba ïadei bad ka jingtreikam jong ka tnat Custom na ka bynta ban pyllait ïa kitei ki jingai sngewbha na ka jaka sangeh liengsuiñ,” la ong u Avasthy.
Katei ka briew ka la phah ïa katei ka pisa, ha kaba hadien kane u briew ïa uba la tip kyrteng kum u Morgan bad u heh jong ka tnat Custom ki la pynkut noh ka jingïakren bad ka, ha kaba kane ka la sngewthuh ba ka la shah thok bad shukor, la ïathuh ki heh pulit. Ïa ka jingujor ejahar la pynngat hapoh ka kyndon 420 jong ka Indian Penal Code Section bad ha ka IT Act jong ka kyndon 66 bad 66D.
“Ha ka por ba ka la don ka jingtohkit, la ïoh jingtip ba kane ka nongmudui ka la shah thok shah shukor ha ka kynhun jong ki runar kiba la treikam ha Delhi-NCR. Ha ka sngi Balang, baroh ki dkhot jong ka kynhun ki runar, kiba sah ha ka ïing wai kaba don ha Nihal Vihar, Delhi, ki la shahkem. Hynriew ngut ki synrang bad kawei ka kynthei kiba dei ki nong Africa ki la shahkem, bad kumjuh kawei ka nong India kaba la ïatreilang bad ki ka la shahkem na Sikkim,” la ong u Avasthy.
Kine kiba la shahkem ki dei kiba la tip kyrteng kum u Daniel John (Ghana), Calvin Okafor Guise (Nigeria), Uchenna Egbu (Nigeria), Jonas Dekka (Ghana), Hibib Fofana (Ivory Coast), Ixa Sagir (Nigeria), bad ka Oyoma Lisa Domenik (Nigeria).
Shuh shuh la ïathuh ba ka Radhika Chhetri, kaba dei ka nong India na Gangtok ha Sikkim, ka la shah ithuh ba ka la dei kawei na ki dkhot jong ka kynhun runar.
Kumba la ïathuh ki pulit, la ong ba ka Chhetri ka la pynshisha ba ka la long kum ka nongmihkhmat jong ka tnat Customs namar ba ka nang ban kren Hindi bad kane ka la long ka nongïarap jong katei ka kynhun ki runar na ka bynta ban pynngop ïa kiba bun ki briew.
Ki pulit shuh shuh ki la ïathuh, ba ki la ïoh ban kurup kumba 31 tylli ki Mobile Phones na ka jingkhmih bniah na kine ki runar. Kine ki Phone ki la don ïa ki Number bad ki Chat jong kumba 600 haduh 700 ngut ki kynthei, la ïathuh shuh shuh ki heh pulit.
Kumba la antad, la ong ba kane ka kynhun runar ka la ïoh ïa ka pisa baroh kaba la wan da kaba shu thok shu shukor ïa ki briew da T. 7 klur.
