New Delhi, ïaïong:
U Myntri ka tnat ïada ri u Rajnath Singh ha ka sngi Palei u la pynpaw ka jingsngewlem halor ka jingjia ba sngewsih jong ka jingduh noh jong san tylli ki mynsiem jong ki shipai ka tnat Army kiba la ïap na ka jingshah thombor ka trok kaba ki shong ha Poonch kaba don ha Jammu & Kashmir.
Ïa kine ki shipai kiba la ïap la tip kyrteng kum u Havildar Mandeep Singh, Lance Naik Debashish Baswal, Lance Naik Kulwant Singh, u Sepoy Harkrishan Singh bad u Sepoy Sewak Singh, jong ka kynhun 16 Corps jong ka tnat shipai Indian Army kaba don ha Nagrota.
Ha ka jingphah jingthoh jong u lyngba ka Twitter, u Singh u la pynpaw ka jingsngew pang mynsiem, halor kane ka jingjia bad ong, “Nga la dap da ka jingbitar haba jia kane ka jingjia kaba sngewsih ha Poonch District (J&K), ha kaba ki shipai ka tnat Indian Army ka la duh noh ïa ki shipai kiba shlur hadien ba ka trok kaba ki shong ka la kem ding. Ha kum kane ka por ba jia kane ka jingjia kaba sngewsih ka jingsngewlem jong nga ka leit sha ki longïing jong kine ki shipai kiba la ïakynduh ïa kine ki jingeh ha kaba ki la duh noh ïa ki baïeid bathoiñ jong ki.”
Kane ka jingthoh jong u Myntri ka tnat ïada ri ka la wan hashwa ba ka tnat shipai kan pynshisha ba ki san ngut ki shipai ki la ïap na ka jingshah thombor ha ki lehnoh.
U Lieutenant Governor jong ka Jammu & Kashmir u Manoj Sinha ruh u la pynpaw ka jingsngewlem halor ka jingïap jong ki san ngut ki shipai bad ong, “Nga dap da ka jingsngewsih jur halor ka jingïap jong kine ki shipai ha ka jingjia kaba sngewsih kaba la jia ha Poonch. Ngin ym lah ban klet ïa ka jingshakri jong ki ïa ka ri. Ka jingsngewlem jong nga ka leit sha ki bahaïing jong kine ki shipai.”
U President barim jong ka seng Congress u Rahul Gandhi u la ong ba ka khubor halor ka jingshah pynïap jong ki san ngut ki shipai ha ka jingthombor jong ki lehnoh ha Poonch jong ka Jammu & Kashmir ka long ka jingjia kaba sngewsih.
“Nga pynpaw ka burom sha kine ki shipai kiba la khlad bad kumjuh ka jingsngewlem sha ki bahaïing jong ki,” la ong u Gandhi.
U Vice-President jong ka National Conference u Omar Abdullah ha ka jingphah khubor, u la ong, “Ka la long ka khubor kaba sngew shyrkhei halor ka jingthombor jong ki lehnoh ha Poonch kaba la shim ïa ka jingim jong ki san ngut ki shipai kiba dang don ha ka kam. Nga pynrem jur halor kane ka kam thombor jong ki lehnoh nga phah ka khubor sngewlem sha ki baïeid bathoiñ jong kine kiba la khlad noh. Ai ba ka mynsiem jong ki kan jahthait ha ka jingsuk.”
Ki shipai ki dang pynlong ka jingleit thwet jur ïa ki lehnoh kiba la donkti ha ka jingjia bad ki la pynlong ka jingkerkut ha katei ka thaiñ khnang ban ïoh kem lut ïa ki lehnoh kiba la lait phet.
