New Delhi, ïaïong:
Naba la sakhi ba ka jingtih beaiñ ïa ki mar poh khyndew ha ki bynta khappud ka la buh jingma shibun, ki bor sorkar ki la buh da ka jingmaham ban kem ïa ki briew kiba dang bteng ïa ka jingtih beaiñ ïa ki mar poh khyndew khamtam hadien ba ki la ïoh jingthoh ba la dei ban sangeh noh ïa kine ki kam beaiñ jong ki kiba buh jingma ha kiba bun rukom.
Kum shi bynta ban ñiew ba ka jingdon jong ki par tih mar poh khyndew ha ki thaiñ kiba don ha ki bynta khappud jong ka Indo-Pak ha Punjab kum ka bynta kaba ap jingma ha ka liang ki lad jingïada ïa ka ri, u Lat jong ka jylla Punjab u Banwarilal Purohit u la ong ba lada lap ïa kino kino ki briew ba donkti ha kum kine ki kam beaiñ la dei ban pynngat ïa ki ha ki kyndon jong ka aiñ.
U Purohit, uba la don bynta ha ka jingleit jngoh ïa ki shnong kiba don ha ki bynta khappud, u la bthah ïa ki heh sorkar ba ki la dei ban khmih bniah bad ban peitngor bha halor ka jingdon jong kine ki par tih marpoh khyndew ha ki bynta khappud.
U la ong ba ha ryngkat kiwei pat ki kyndon la dei ban pynngat ïa ki briew kiba donkti ha ka ban tih beaiñ ïa ki marpoh khyndew ba bun ha ki bynta khappud.
“Ka jingshngaiñ hapoh ka ri ka la ap jingma bad ym lah ban pdiang lada jia ei ei na kane ka jingleh thurmur. La ïoh khubor ba ki la don ki jingïasngewthuh jingmut lang jong ki pulit bad ki nongpynkheiñ aiñ ha ki katto katne ki thaiñ kiba don ha ki bynta khappud bad la dei ban pynduh noh shi syndon kum ïa kine ki kam sniew,” u la ong ha ka jingïakren bad ki nongpynïaid shnong jong ki shnong kiba don ha ki bynta khappud.
Kine ki jingkren jong u ki la long khyndiat sngi hadien ba ki shipai ka tnat Border Security Force (BSF) ki la phah jingtip sha ka Punjab and Haryana High Court ba ka jingtih ïa ki marpoh khyndew ha ki bynta khappud ka la nang ïai bteng haduh mynta.
Nalor ka jingktah ïa ki tyllong um ba bun jong ka wah Ravi, ka la buh jingma ruh ha kaba ïadei bad ka jingshngaiñ hapoh ka ri, la ong ki shipai ka tnat BSF, u la ong.
