Bhopal, ïaïong:
Ki bor ba dei khmih ki la ong ba ka jingduna jong ka jingpyllang jingbam ka la buh jingkhuslai shibun ïa ka sorkar khamtam hadien ka jingshah pynjulor bun jong ki jingthung jingtep na ka jingwan hap kynsan jong u slap bad u phria ha ka aïom ka bym pat dei kata ha ki bnai ba la lah. Kumba la khmih bniah la ong ba kane ka jingduna jingbam ka lah ban buh jingma ïa ka jylla Madhya Pradesh na ka bynta ki snem ban wan khamtam hadien ka jingshah pynjulor jong ki jingthung jingtep.
Kumba la sakhi, la ong ba hadien ka jingjur jong ki jingshah pynjulor jong ki jingthung jingtep ha ka jylla baroh kawei, ki nongrep ki la ïathuh shai ba mynta ka la shem jingeh na ka bynta jong ki ban ïoh ban pyllang jingbam na ka daw jong ka jingjur palat ka jingjulor jong ki jingthung jingtep khamtam na ka jingwan hap jong u slap u bym dei ban hap ha ka aïom ba dei ban hap bad kiwei pat ki jingthombor jong ka mariang khamtam haba wan ka jingshlei um.
U Myntri Rangbah jong ka Madhya Pradesh u Shivraj Singh Chouhan u la hukum ïa ki bor ba dei khmih ba ki la dei ban ai da ka jingbatai kaba bniah ha kaba ïadei bad ka jingleit jurip jong ki ïa ki jingthung jingtep kiba la shah pynjulor na ka daw jong ka jinghap jong u phria bad ka jingwan hap jong u slap bad jingshlei um khlem dei ka aïom hap slap ha ki katto katne ki bynta jong ka jylla khnang ba ki nongrep kiba la shah ktah jur kin ïoh ïa ki lad jingïarap.
Ki nongrep kiba la shah ktah jur ki la dei ban ïoh ïa ka bailutksan, kynthup ha kaba ïadei bad ki jingïarap kiba hap hapoh ka Crop Insurance Scheme, la pynbna u Myntri Rangbah. U la ong ba ka sorkar borabor ka la ïeng na ka bynta ki nongrep bad “kan sa leh na ka bynta ki jingdonkam baroh ha kaba ïadei bad ka jingïakynduh jingeh jong ki ha kaba ïadei bad kane ka jinglong jingman”.
Baroh ar kata ki nongïalam jong ka BJP bad ki nongïalam jong ka seng Congress ki la dawa ïa ka jingtip kaba bniah ha kaba ïadei bad ka jingpynlong ïa ka jingwad bniah halor ka jingshah pynjulor jong ki jingthung jingtep ha ka thaiñ Gwalior-Chambal bad Central MP. “Hashwa ki la dep ban mad jingeh lypa na ka jingbym ïoh ïa ki symbai bad ki dawai pynïap khñiang, ki nongrep jong ka jylla mynta ki la ïakynduh jingeh sa ha kaba ïadei bad ka jingshah pynjulor jong ki jingthung jingtep na ka daw ka jinghap jong u slap bym dei por bad hajuh ka por ka jinghap jong u phria. Ngi buh ka jingdawa ba hadien ka jingpan jingtip ba bniah jong ka sorkar ha kaba ïadei bad ka jingshah pynjulor jong ki jingthung jingtep yn bud sa ka jingai ïa ka bailutksan na ka bynta ki nongrep,” la ong u nongïalam jong ka seng Congress u Kamal Nath.
U MP jong ka seng BJP u KP Yadav u la phah shithi sha u Myntri Rangbah bad sha u Myntri uba dei khmih ïa ka tnat ka rep ka riang, ha kaba u la batai shai ïa ka jinglong jingman ha ki shnong kiba kynthup ïa ka Shivpuri, Ashok Nagar bad Guna distrik na ka jingshah pynjulor jong ki jingthung jingtep.
Kane ka jingthmu ban ai jingïarap ïa ki nongrep ka long shi bynta ban kyrshan ïa ki ha kaba kin lah ban khie khlieh na ka bynta ban sdang ïa ka kam rep jong ki ha ka aïom bet. Na ka liang ki nongrep ki la pynpaw ba kan don ka jingeh kaba khraw lada ka jingshah pynjulor jong ki mar rep kan ïai bteng ha ki aïom ot jong ki snem ban wan, khamtam ba ka jingpyllang bam ka la shah ktah jur naduh ka jingwan lynshop jong ka khlam Covid-19.
Ha kaba ïadei bad kane ka bynta, na ka liang ka sorkar ka la ïaleh katba lah ban ai ka jingkyrshan ïa ki nongrep khnang ba kin lah ban kyrshan bad ban lah ban pynmih shuh shuh ïa ki jingthung jingtep ha ki snem ban wan.
