Srinagar, ïaïong:
Kum shi bynta ban lah ban buddien ïa ki lehnoh kiba la donkti ha ka kam thombor kaba dang jia shen ha Poonch, ki pulit ki la pyntreikam lang da ki kor ki bor, ki kynhun pyllip bom bad ki ksew sma dien ban lap ïa ki lehnoh kiba la donkti ha ka ban pynïap ïa ki shipai.
Ka kynhun NIA, kynthup u Deputy Inspector general bad ki heh pulit jong ka kyrdan Superintendent, ki la leit ban jurip bniah ïa ka jaka ba la jia ka jingshah thombor jong ki shipai ha Poonch kaba don ha J&K.
Ki shipai ka tnat Indian Army bad kiwei pat ki shipai ïada ki la pynlong ïa ka jingleit thwet lehnoh kaba jur khnang ban ïoh ban kem bad ban ïakhun pyrshah ïa ki lehnoh kiba la donkti ha ka kam thombor kaba la jia ha Poonch ha kaba ka trok kaba la shong da ka kynhun jong ki shipai ka la shah thombor ha ki lehnoh ha kaba ki la don kumba san ngut napdeng jong ki kiba la ïap.
Ka kynhun National Investigation Agency (NIA) ka la leit jurip bniah ïa ka jaka ba la jia ka jingshah thombor jong ki shipai.
Hapoh ka kynhun NIA, la kynthup ruh ïa u Deputy Inspector General bad ki Superintendent of Police Rank Officer.
Ka kynhun pyllip bom bad ka kynhun Special Operations Group (SOG) jong ki pulit ka Jammu & Kashmir ki la poi ha katei ka jaka kaba ha Bhimber Gali kaba don ha Poonch ha kaba ki la don kumba san ngut ki shipai kiba la duh noh ïala kajong ka jingim ha ka jingshah thombor ha ki lehnoh.
Ka la don ka jingleit thwet kaba jur ïa ki lehnoh ha ki bynta ki khlaw kiba don ha ka thaiñ Bata-Doriya ha Jammu & Kashmir na ka bynta ban ïakhun pyrshah bad ban ïohkem ïa ki lehnoh.
Ïa ki shipai kiba la shah pynïap ha katei ka jingjia la ithuh da ka kyrteng kum u Havildar Mandeep Singh, Lance naik Debashish Baswal, Lance naik Kulwant Singh, Sepoy Harkrishan Singh bad u Sepoy Sewak Singh kine ki la trei ha ka kynhun Rashtriya Rifles jong ka tnat shipai India Army bad ki la shah pyntreikam ha kane ka thaiñ na ka bynta ban ïakhun pyrshah ïa ki lehnoh.
Ki la don kumba katto katne tylli ki khubor ba la ïoh pdiang kiba la pynshihsa ba ka thaiñ Bata-Doriya ka la shah kerkut bad la pyndonkam da ki Drone bad ki ksew sma dien na ka bynta ban buddien ïa ki lehnoh.
U Chief of the Army Staff General u Manoj Pande bad baroh ki heh ka tnat shipai Indian Army ki la leh burom khatduh na ka bynta kine ki shipai kiba la shah pynïap.
U Myntri ka tnat ïada ri u Rajnath Singh u la ïoh ïa ka jingbatai bniah halor ka jingjia na u Army Chief General Manoj Pande ha kaba ïadei bad ka jingïap jong ki san ngut ki shipai.
Katkum ka jingïoh jingtip na ki pulit jong ka Jammu & Kashmir, la ong ba ym duna ïa ki hynñiew ngut ki lehnoh jong ka kynhun Lashkar-e-Taiba kiba la don bynta ha ka ban leh ïa ka kam thombor ha kaba ki la siat da ki ‘namding bad ki bom kawang kti bad siat ruh da ki suloi pyrshah ïa ki shipai jong ka kynhun RR kiba la shong ha ka trok.
Haduh ba la thoh ïa ka khubor ym pat lah ban tip tikna ïa ka daw tynrai ha kaba ïadei bad ka jingkem ding bad ka jinging jong ka trok ba kitei ki shipai ki la shong ha ka por ba ki la shah thombor.
