Chennai, ïaïong:
Ki pulit jong ka Tamil Nadu ki dang bteng ïa ka jingtohkit halor ki kam pyntriem ban tip ïa ka jingshisha la ki lehnoh kiba la shah kynnoh donkti ha ki kam pyntriem ha Mangaluru bad ha Coimbatore ki don bynta ei ei ne em.
Haduh ba la thoh ïa ka khubor ki pulit ki dang pynlong ïa ka jingtohkit kaba bniah ban tip la u snar ba shah kynnoh donkti ha ka jingjia pynbthei bom ha ka Auto Rickshaw ha Mangaluru ka don bynta ei ei ne em bad u snar ba donkti ha ka jingpynbthei bom hapoh ka kali kaba la jia ha ka 19 tarik, Naiwieng jong u snem ba la lah ha kaba ma u ruh u la ïap ha ka jingjia ha Coimbatore,” la ong u heh pulit.
“Kumba ka long mynta ngi la lap ïa ki sabut hapdeng ka jingïatreilang jong ki,” la ong u heh pulit jong ka Tamil Nadu.
U snar ba la shah kynnoh donkti ha ka jingjia ïa uba la tip kyrteng kum u Mohammed Shariq, uba la 24 snem ka rta, u la mynsaw, ha kaba u la ing da kumba 50% ha ka jingbthei bom kaba la jia ha Mangaluru ha u Naiwieng jong u snem ba la lah, ha kaba la ñiew ba kane ka long ka kam pyntriem jong ki lehnoh, la ïathuh ki pulit.
Ha kaba ïadei bad uwei pat u snar nongpynbthei bom ïa uba la tip kyrteng kum u Jameesha Mubeen, uba la 25 snem ka rta, uba la ing haduh ban da ïap haba kawei na ki Cylinder kaba don hapoh ka Maruti 800, ha kaba ma u u la ñiah, ka la bthei kynsan ha Coimbatore ha ka jingjia kaba la jia ha ka 23 tarik, Risaw.
Kumba ka long mynta, ka kynhun National Investigation Agency (NIA) ka dang ïaid shakhmat ban pynlong ïa ka jingtohkit.
Ki pulit jong ka Tamil Nadu kiba la bteng ban lum jingtip shaphang ki briew ba la ïatreilang bad u Shariq ha ka por ba ki la pynlong ïa ka jingtohkit ki la ïathuh ba la paw ba une u runar u la pyndonkam da u Aadhaar Card jong u nongshong shnong jong ka Coimbatore u Surendran na ka bynta ban ïoh ïa ka SIM Card.
Ki pulit jong ka Karnataka ruh ki la suba ba u Shariq u la don ha Tamil Nadu na ka bynta ban pynbiang ïa ki tiar na ka bynta u bom.
“U Shariq um shym la paw ha ka jingwad bniah jong ngi ba hashwa,” la ïathuh u heh pulit na Coimbatore.
Ha kaba ïadei bad kane ka jingjia, u Superintendent of Police jong ka Nilgiris u Ashish Rawat u la kyntait halor ka kaiphot ba u Surendran u la shahkem na ka bynta ka jingshah kylli jingkylli.
“Ngim pat kem ïa u ne ïano ïano ruh ha kaba ïadei bad ka jingjia,” la ong u Rawat. Baroh arngut, kata u Shariq bad u Mubeen la lap ba ki la long ki nongkyrshan jong ka kynhun lehnoh Islamic State (IS), la ïathuh ki pulit.
Hashwa kane, u Myntri Rangbah jong ka Karnataka u Basavaraj Bommai bad ki heh pulit ki la ong ba ka jingbthei bom ha ka Autorickshaw ka la long na ka jingpynbthei da u bom Improvised Explosive Device (IED).
Ha kaba ïadei bad ka jingjia jong ka jingbthei bom ha Tamil Nadu, ka kynhun NIA ha ka 10 tarik, Naiwieng jong u snem ba la lah ka la ong ba ki la don kumba 6 ngut ki briew kiba la shahkem halor ka jingshah kynnoh ba ki la ïasuhbuitlang bad u Mubeen na ka bynta ban pynïoh ïa kiba bun ki jingdonkam na ka bynta ban shna ïa ki bom IED na ka dukan kaba shu Online na ka bynta ban leh bad pynjur ïa ki kam pyntriem jong ki lehnoh.
Hashwa ban aiti ïa ka jingtohkit sha ka kynhun NIA, ki pulit jong ka Coimbatore ki la kem ïa ki 6 ngut ki briew kynthup ïa ki nongïarap jong u Mubeen hapoh ka jingtreikam jong ka Unlawful Activities (Prevention) Act bad kurup ïa u Potassium Nitrate uba 75 kilo, Aluminium Powder, u rnga bad ka Sulphur ba la pyndonkam ban shna ïa ki bom pynbthei na ka ïingsah jong u Mubeen.
Ha u snem 2019, ka kynhun NIA ka la kylli jingkylli na u Mubeen, uba long u Engineering Graduate, halor ka jingdonkti jong u bad u Mohammad Azharuddin uba dang shah set patok mynta halor ka jingdonkti jong u ha ka jingpynbthei bom ha ka sngi ba la lehniam Paskha Sri Lanka ha u snem 2019.
Ha ka 10 tarik, Naiwieng, ka kynhun NIA ka la pynlong ïa ka jingleit thwet sha kylleng ki jaka kiba don hapoh Tamil Nadu bad la ong: “Hadien ba la dep ban smai sha ki lehnoh IS, u Mubeen u la thmu ban leh ïa ka kam kheiñduh bad ban wanrah shibun ki jingpynjulor khamtam ha ki jaka mane blei halor ka jingthmu ban leh ïa ki kam thombor jong ki lehnoh hapdeng ki kynhun ba la jied bad buh jingmut ban thombor.”
