New Delhi, ïaïong:
Ka heh nongïalam jong ka seng Congress ka Priyanka Gandhi Vadra kan sa ai jingkren ha ka jingïalang paidbah ka ban sa long ha Telangana ha u bnai Jymmang na ka bynta ban wanrah ïa ki mat ba ïadei bad ka jingnang bun ki bym ïoh kam ïoh jam ha ka jylla.
Ka Priyanka Gandhi Vadra kan sa ai jingkren ha ka jingïalang paidbah ban pynïaid da ka Telangana Pradesh Congress Committee ha Hyderabad ha ka taïew kaba nyngkong jong u bnai Jymmang na ka bynta ban pynpaw paidbah ïa ka jingnang bun jong ki bym ïohkam ïohjam ha ka jylla, la ong u President jong ka PCC u A Revanth Reddy. Ha ka jingai jingkren ha ka jingïalang kaba la long ha Gandhi Bhavan, u heh jong ka PCC u la ong ba ïa ka jingïalang paidbah kaba heh yn sa pynlong ha madan Saroornagar ha ki bynta ba marjan bad ka Hyderabad.
“Ïa ki tarik ban pynlong ïa ki jingïalang yn sa pynbna hadien ba la ïoh ka jingpynshai na ka Priyanka Gandhi Vadra ka ban sa long ka kongsan ha kine ki jingïalang paidbah,” u la ong.
U Revanth Reddy u la ong ba ha ka jingleit jngoh jong u sha Hyderabad ha ka lah sngi U Blei, u Rahul Gandhi u la pyntikna ha kaba ïadei bad ka jingïashim bynta jong ka Priyanka Gandhi Vadra. “Ïa mynta, kane ka la bunkam bha ha kaba ïadei bad ki jingïalap ilekshon ha Karnataka bad kan sa leit ban jngoh ïa ka Hyderabad na ka bynta ka jingïalang paidbah shwa ba kan leit sha Karnataka,” u la ong. Kane kan sa long ka jingïalang paidbah kaba ha ka sien kaba nyngkong eh ban ai jingkren da ka Priyanka Gandhi Vadra ha Telangana. Kam pat ju leit ha kano kano ka jingïalang jong ka seng Congress ha ka jylla. Ki nongïalam jong ka seng kin sa leh burom ïa u durmot jong u Srikantha Chary.
“Ngin sa batai shai ha kano ka rukom ka seng Congress kan sa leh na ka bynta ki samla ynda ka wan ha ka bor synshar ha ka sorkar kmie bad ha ka jylla. Baroh ki samla kiba khlem kam khlem jam bad ki kynhun seng jong ki samla pule ki la ïashim bynta ha ka jingïakhih,” la ong u heh nong ka PCC. “Kumjuh ki jingïakhih ki la long ruh ha Khammam ha ka 24 tarik, Ïaïong kata hynnin ka sngi bad ha Adilabad ha ka 26 tarik, Ïaïong,” u la bynrap. U heh ka PCC u la ong ba un sa sdang ban pynlong ïa ka Padayatra jong u ha ka kyrteng “Hath Se Hath Jodo Yatra” ka ban sdang na Jogulamba distrik naduh ka 9 tarik, Jymmang.
