New Delhi, ïaïong:
Ka Municipal Corporation of Delhi (MCD) ka la ïoh ban kurup palat 14,164 kilo ki plastik ïa kiba la shah khang ban pyndonkam bad ai da kumba 1,596 tylli ki Challan ha ka por ba la don ka jingïalap (Campaign) kaba 100 sngi ban ïakhun pyrshah ïa ki plastik kaba la kut noh ha ka sngi Saitjaiñ na ka bynta ban rakhe ïa ka International Earth Day, kumba la ïoh jingkheiñ na ka Civic Body.
U Lieutenant Governor jong ka Delhi u VK Saxena u la pynlong ïa ka jingpyntreikam pyrshah ïa ki plastik ha Baansera hajan Sarai Kala Khan ban pynduna ïa ka Single-Use Plastic (SUP) ha ka nongbah ha ka 21 tarik, Kyllalyngkot. Ki jaka bapher bapher kiba la ïashim bynta na ka bynta ban ïakhun pyrshah ïa ki plastik ki la ïoh ban kurup ïa kiba bun ki plastik, ha kaba kaba bun eh ka la long da 2,080 kilo ha kaba ïa kane la ïoh ban kurup na Rohini, bad sa 1,898 kilo na South Zone, 1,632 kilo na West bad 1,592 kilo na Shahadra kaba don ha East Delhi.
Ki lai tylli ki bynta, ha kaba la duna tam ha ka ban ïoh kurup ïa ki plastik ka la long ha Keshavpuram, ka bynta ba marpdeng jong ka Delhi, bad ka Karol Bagh. Ka jingpyntreikam ha kaba ïadei bad ka jingïohlum ïa ka kaiphot na ki 12 tylli ki bynta kiba hap hapoh ka jingkhmih jong ka Corporation la ong ba ka Civic Body ruh ka la ïatreilang na ka bynta ban pyntikna ha ka ban pynlong ïa kiba bun ki Park, ki Mall, ki ïew ba ju long shisien shi taïew, ki jaka ai jinghikai bad ki jaka bam jingbam ki jaka kiba lait na ka SUP. Ka Civic Body ka la jan lah ban pyllait ïa ki ïew kiba ju plie shisien shi taïew na ka jingpyndonkam plastik.
Katkum ka kaiphot ba la ïohlum na ka MCD la ong ba ki la don kumba 132 tylli ki ïew ba ju plie shisien shi taïew ïa kiba la shah khmih bniah ha ka por ba la pynlong ïa ka Campaign hynrei ki la don tang kumba 23 tylli ki jaka ïa kiba la shah pynshisha ba ki la lait na ka SUP, kynthup ïa ki 9 tylli ki ïew kiba ju pynlong shisien shi taïiew kiba don ha Rohini, ha kaba mar san ha ka bynta ba marpdeng bad shaphang Shatei jong ka Shahadra bad saw tylli ha Najafgarh. U heh jong ka tnat Municipal u la ong ba ha ka por ba la pynlong ïa ka Campaign, ka Civic Body ka la buh ïa kumba 34 tylli ki PET Bottle Crusher Machines ha ki High-Footfall.
“Ki la don kumba 14,164 kilo ki plastik ïa kiba la ïoh ban kurup ba la phah sha ki heh ba dei khmih na ka bynta ban shna pynthymmai biang ïa ki bad ban ïoh ban shna ïa ki ben, ki Board bad ki T-shirt na ki plastik. Ngi la khmih bniah bha ïa ki Park, ki Mall, ki ïew ba ju plie shisien shi taïew, ki Community Centre, ki skul, ki skulbah bad ki Restaurant ba kin long ki jaka kiba lait na ka SUP ha kine ki 100 sngi. Ka MCD ka la buh ruh ïa ki 600 tylli ki Vikalp Stall ha kylleng ki thaiñ kiba hap hapoh ka jingkhmih jong ka MCD ha kaba ki paidbah ki lah ban thied ïa ki pla jaiñ da kaba ai tang T. 20,” la bynrap u heh sorkar.
U Mayor Shelly Oberoi u la ong ba la dei ban don ka jingkitkhlieh ha ka ban leh ei ei na ka bynta ki jingeh kiba wan lyngba ki jinglynshop ki bor mariang, ka jingshit bad ka jingjaboh kiba la wanrah na ki plastik.
