Bengaluru, ïaïong:
Ka Income Tax Department ha ka lah sngi U Blei ka la pynlong ïa ka jingleit khynra sha ki ar tylli ki jaka sah bad ki jaka treikam jong u nongïalam barim jong ka seng Congress u Gangadhar Gowda bad sha ka jaka pule kaba don ha Belthangady jong ka Dakshina Kannada ha Karnataka.
Katei ka jaka pule ka dei ka jong u khun jong u Gangadhar Gowda u Ranjan Gowda.
U Gowda u la mih noh na ka seng BJP bad leit ban pynïasoh bad ka seng Congress ha u snem 2018. Dang shen u la pynbna ba u la shongthait noh na ka kam saiñ pyrthei hadien ba um shym la ïoh tiket na ka bynta ban ïakhun ha ka ilekshon Assembly ha Karnataka.
Ha kaba ïadei bad kane, ka Income Tax (IT) Department ka la pynlong ïa ka jingleit khynra sha kiba bun ki jaka kiba don ha Tamil Nadu.
“Ki heh jong ka tnat IT ki la pynlong ïa ka jingleit khynra ha palat 50 tylli ki jaka kiba don ha Tamil Nadu, ha kaba ïadei bad ka jingshah kynnoh ba u la donkti bad ka kompeni jong ki riewshimet,” la ïathuh ka tyllong khubor.
Nalor kane ka tyllong khubor ka la ïathuh shuh shuh, ba ka kompeni jong ki riewshimet ka la ïajan bha ha ka jingpyntreikam bad ka seng DMK.
U heh jong ka kompeni Karthik u dei u khun jong u MLA ka DMK ha Anna Nagar u MK Mohan ha kaba ka ïing jong u ruh ka la shah khynra ha ka Income Tax.
Ka kynhun jong ki nongbud jong ka seng DMK ki la pynlong ïa ka jingïakhih hadien ba ka tnat IT ka la pynlong ïa ka jingleit khynra ha ka ïingsah jong u khun jong u nongïalam jong ka seng DMK, uba dei u heh jong ka kompeni, la ïathuh ka tyllong khubor.
