Hyderabad, ïaïong:
Ka sorkar Telangana ka la ïai bteng ha ka ban leit jurip bniah ïa ki jaka ba la thmu ban shna bad wanrah ïa kiba bun tylli ki surok ki ban long ka jingmyntoi ïa ki paidbah khamtam ha kaba ïadei bad ka jingleit jingleit jong ki sha ki jaka ba kham jngai.
Ka sorkar ka la phah pynsted ban leh ïa kane ka kam khamtam ha kane ka por ba dang kham duna ka jinghap slap ha kaba la ong ba la kumno kumno ïa kine ki surok yn sa lah ban pyndep kham kloi bad ba yn ym pynsahteng ïa ki kumba la thmu.
Kumba la mut hashwa, ka sorkar ka la khmih bniah ïa ki jingdonkam jong ki riewpaidbah khamtam ha kaba ïadei bad ka leit ka wan da kaba thmu ban wanrah bad ban shna ïa bun tylli ki surok.
Ka jingthmu jong ka sorkar ban shna shuh shuh ïa ki surok ka long ban kham pynkylluid ïa ka nongbah bad ban pynkloi ïa ka por ha kaba ïadei bad ka jingleit jingleit jong ki briew.
Ha kaba ïadei bad kane kajuh ka jingthmu, ka sorkar Telangana ka la tyrwa ban shna ïa saw tylli ki lynti krem ki ban ïaid lyngba ka lad KBR Park sha NFCL Junction, Punjagutta. Ka sorkar jylla ka la jied ïa ka Greater Hyderabad Municipal Corporation (GHMC) ban khmih ha kaba ïadei bad ka jingpyntreikam, ha kaba kan sa pule bniah bad ban bniah halor ka kaiphot ba ïadei bad ka Project.
Kumba ka long mynta, la ong ba ka Syama Prasad Mookerjee Tunnel ka la long ka lynti krem kaba jrong tam ha India da kumba 9.20 km bad ka ban ïasoh ïa ka Kashmir bad kiwei pat ki bynta jong ka ri.
Ka sorkar hashwa kane ka la buh ka jingtyrwa na ka bynta ban pyntreikam ïa ki hynriew tylli ki lad kiba don ha ki bynta jong ka KBR Park da kaba shna ïa kiba bun tylli ki lynti suiñ hapoh ka jingtreikam jong ka SRDP Project, hynrei kane ka donkam na ka bynta ban pynkhyllem ïa palat 1,500 tylli ki dieng.
Hynrei kumba ka long mynta, na ka jingïoh jingtip la ong ba ka sorkar Telangana ka la rai ban nang pynbun shuh shuh ïa ki lynti krem khnang ba kan ïarap ha ka ban ïada bad kiar na ka jingpom ïa kiba bun ki dieng ha ka KBR Park na ka bynta ka Strategic Road Development (SRDP) Project.
Ka sorkar kmie ka la mynjur na ka bynta ka jingpyntreikam ha kaba ïadei bad kane ka bynta naduh ki khyndiat snem ba la leit hynrei la ong ba ka Civic Body (GHMC) kam dei ban ktah ïa ki dieng kiba don hapoh ka jingker kaba nyngkong jong ka kynroh jong katei ka Park kaba hap hapoh ka Eco-Sensitive Zone (ESZ). Ki dieng kiba don shabar jong ka jingker kaba ar kam shym la hap hapoh ka ESZ.
Hadien kane, u Myntri ka Municipal u KT Rama Rao u la bthah ïa ki heh ba dei khmih ba ki dei ban nang pynbun ha kaba ïadei bad ka jingshna ïa ki lynti krem khnang ban khanglad ïa ka jingshah pom bad ka jingpynkhyllem ïa kiba bun ki dieng kiba lah ban wanrah ïa ki jingjulor jong ka mariang.
