New Delhi, ïaïong:
Ki shipai ïada khappud ki la nang pynjur ïa ka jingpahara bad ka jingpeitngor ha kaba ïadei bad ka jingïai bteng jong ki nong Pakistan ban pynpoi bad khaïi ïa u Heroin na Pakistan, kane ka la long hadien ba la sakhi ba kiba kum kine ki jait kam ki la nang jur katba nang mih ki sngi khamtam ha ki thaiñ kiba don ha ki bynta khappud jong ka Rajasthan.
Ha kaba ïadei bad kane ka kam sniew, ki riewshimkabu ki la pyndonkam da ki Drone ha kaba ïadei bad ka jingkhaïi ïa u drok, ha kaba kane ka bynta ka la shah khmih bniah, la ïathuh ka tyllong khubor. Kumba la sakhi, la ong ba ïa u Heroin la phah na kylleng ki bynta khappud lyngba ka jingpyndonkam da ki Pipe, ha kaba kane ka la don hapoh ka jingshah khmih bniah.
Ha ki bnai ba la leit, la ïoh ban kurup ïa u Heroin uba shongdor palat ïa ka T. 70 klur ha ki bynta khappud jong ka Pakistan kaba marjan bad ka Sri Ganganagar distrik. Ym tang ki nongkhaïi tuh, hynrei kaba ma mynta ka long ba ki lehnoh ruh ki la nang pynjur ïa kum kine ki kam ha ki bynta khappud nalor u drok ki la pyndonkam ruh ban pynpoi da ki Drone ïa ki tiar siat.
Ha kaba ïadei bad ki rukom pynkylla halor ki kam jong ki lehnoh mynta la paw ba ki la pyndonkam da ki pistol na ka bynta ki kam pynïap briew ha Kashmir.
Kumba la sakhi, la ong ba kane ka la long hadien ba la lap ïa ki pistol ba la pynhap ha ki bynta khappud, ha kaba la ong ba kine ki atiar ki long ki rukom pyntreikam bathymmai na ka bynta ba pynïap ïa ki shipai ïada khappud ha Kashmir. Ïa kane ka jingpyndonkam da ki Drone ban phah sha kylleng ïa ki tiar siat ka la long hadien ka jingshah kem jong ki arngut ki lehnoh ha ki bnai ba la lah kiba dei jong ka kynhun The Resistance Front (TRF), kaba la mih na ka kynhun Lashkar-e-Taiba (LET) ha ka thaiñ Chanapora jong ka Srinagar.
Kumba la ïathuh ka tyllong khubor kaba la wan na ki pulit, la ong ba kine ki arngut kiba la shahkem ki la ïoh ban pdiang ïa ki tiar siat ha ka song ba la buh bad kine kin sa aiti ïa kine ki tiar siat sha ki briew kiba ha Srinagar ïa kiba la shah buh ban leh ïa ki kam thombor ha ka ban leh ïa ki kam pynïap briew ha ka thaiñ. Kumba la ïathuh ka tyllong khubor, la ong ba ka kynhun shipai BSF ka la nang pynjur ïa ka jingpahara ha ki bynta khappud khnang ban lah ban khanglad ïa ka jingthmu jong ki riewsniew ban thombor ïa ka ri da kaba pyndonkam da kitei ki kor ki bor khamtam ha ki bynta khappud.
