Mumbai, ïaïong:
Ka Directorate of Revenue Intelligence (DRI) ka la ïoh ban kem ïa ki 18 ngut ki kynthei kiba dei ki nong Sudan halor ka jingdonkti jong ki ban khaïi ïa ka ksiar kaba la kot sha ka T. 10.16 klur na ka jaka sangeh liengsuiñ kaba don ha Mumbai, la ïathuh ki heh pulit, ha kaba ki la bynrap shuh shuh da kaba ong ba ki la ïoh ruh ban kem ïa kawei ka nong India kaba la long ka nongïarap ha kaba ïadei bad kane ka kam.
Ka la don ka jingpynkhlaiñ ha kaba ïadei bad ka jingpyntreikam ïa ki pulit jong ka kynhun DRI ha Chhatrapati Shivaji Maharaj International Airport hadien ba la ïoh jingtip ha kaba ïadei bad ka jingdon jong ka kynhun kaba la khaïi ïa ka ksiar sha India da ka kynhun jong ki nongleit jingleit kiba la wan na United Arab Emirates (UAE) sha Mumbai ha ka lah sngi U Blei.
Ki la lah ban ithuh ïa kine ki briew bad ki la pynlong ka jingkerkut ïa kine ki briew kiba don ha ki lai tylli ki liengsuiñ.
Na ka jingkhmih bniah ïa ki jingrah jingrong jong ki la lap ïa ka ksiar kaba don ka jingkhia kaba 16.36 kg ha kaba la shem ba ïa ka ksiar la pynlwet, la shaiñ lyngkhot bad kumjuh ha ki jingdeng kiba har rukom. Ki heh jong ka kynhun DRI ki la ong ba kiba bun na ka ksiar ba la ïoh ban kurup la lap ba la buh hapoh ka met jong kine ki nongkhaïi tuh, ha kaba ka la shem shitom na ka bynta ban lap ïa ki.
Ki heh ka kynhun ki la ïathuh ba haba la pynlong ïa ka jingleit khynra ha ki jaka sah jong ki la lap ïa ka ksiar kaba 1.42 kg ha kaba la antad ba ka la kot sha ka T. ?88 lak.
Ka jingtohkit ha kaba ïadei bad ka jingjia ka dang ïai bteng khnang ban lap dien shuh shuh ïa ki briew kiba la donkti ha kane ka kam khaïi tuh ïa ka ksiar sha kane ka ri, la bynrap ki heh ba dei khmih.
