New Delhi, ïaïong:
Ka la don ka khubor kaba la wan lyngba ka Email ha kaba ka la maham halor ka jingdon bom ha ka skul ba la tip kum ka Delhi Public School (DPS) kaba don ha Mathura Road ha ki bynta ba shaphang Shathie-Mihngi jong ka Delhi. Kane ka la pynlong ïa ki pulit ba kin pynmih bad pynphet noh ïa baroh ki khynnah skul bad ïa ki briew kiba don hapoh jong ka bad nangne ka la bteng ka jingwad bniah ïa u bom hynnin ka step jong ka sngi Balang. Kumba ka long haduh ka por 10.30 mynstep jong ka sngi Balang, wat hadien ba la pynlong ka jingwad bniah ym shym la lap ïa u bom kumba la ïoh khubor, la ong u Rajesh Deo, uba long u Deputy Commissioner of Police (south-east).
U heh pulit u la ïathuh ba ka khubor jong ka jingbuh ïa u bom ha ka skul ka dei kaba la phah ha ka por 8.30 mynstep jong ka sngi Balang, ha kaba hadien kane ka la don ka jingleit wad sha kylleng ki jaka jong kane ka skul.
“Ngi la ïoh hukum ba la dei ban phah noh ïa baroh ki khynnah skul sha ïing. Ngi la pynlong ïa ka jingwad bniah ïa u bom ha ryngkat ka jingpyntreikam lang ïa ki ksew sma dien,” la ong u Deo.
U DCP u la ong ba ïa kane ka Email la phah na United States ha kaba ka la shim por a ka bynta ban ithuh bad lap ïa u runar uba phah ïa kane ka khubor pyntriem.
Kane ka khubor shah byrngem buh bom ka la jia tang khyndiat sngi hadien ba ka The Indian School ka la ïohpdiang ïa kum kane kajuh ka Email, ha kaba kane ka la pynlong ïa ki bor pynïaid skul ba kin pynmih ïa baroh ki khynnah na ki kamra klas bad phah phet ïa ki na phyllaw jong ka skul, haba la pynlong ïa ka jingwad bniah la shem ba ym shym la lap ei ei na kane ka skul.
Kane ka jingjia ka dei kaba la jia ha ka sien kaba ar ha kane ka skul tang ha ki 6 bnai ba la leit.
