Bengaluru, ïaïong:
Ki heh nongïalam jong ka seng Congress kiba kynthup ïa u Randeep Singh Surjewala, Dr Parmeshwar, bad u DK Shivakumar ki la buh da ka jingmudui ejahar ha High Grounds Police Station kaba don ha Bengaluru pyrshah ïa u Myntri ka sorkar kmie uba dei khmih ïa ka tnat ki kam pohïing bad u heh nongïalam jong ka seng BJP u Amit Shah bad ki nongpynïaid jong ka jingïaid paidbah jong ka seng Bharatiya Janata Party (BJP) kiba la ju kren ïa ki kyntien kiba pyrshah, kiba ïaleh ban wanrah ka jingïabuh shun, ka jingïa-isih bad ka jingkynthoh ïa ka liang pyrshah.
U heh nongïalam jong ka seng Congress ha Karnataka u DK Shivakumar u la ong, “Ki jingpynshitom kin sa long pyrshah ïa u Shah uba la donkti ha ka ban leh donbor bad thombor katkum ki kyndon jong ka aiñ. Lada jia ba u riewpaidbah u leh ïa kine ki kam, un jin da la shahkem. U Myntri ka tnat ki kam pohïing um lah ban ong lada jia ba ka seng Congress ka wan ha ka bor synshar ba kin sa don ki thma paidbah. U la long u Myntri ka tnat ki kam pohïing, ym u nongïalap ilekshon ba pawkhmat jong ka seng BJP.”
“Ki la don palat 20 tylli ki mukotduma kiba la mudui pyrshah ïa nga khlem leh ei ei. Ka Indian National Congress hashwa ka la dep ban buh jingmudui bad ka Election Commission. Hadien ba la dep ban buh ïa ka jingmudui, ngi la wan hangne,” u la bynrap.
Kum shi bynta ban pynshisha halor ka jingpyntreikam, u heh nongïalam jong ka seng Congress u Randeep Singh Surjewala u la ong, “Ngi la hap ban leit sha High Grounds PS ha ryngkat ka mat kaba donkam. Ngi la buh da ka jingmudui ejahar pyrshah ïa u Myntri ka tnat ki kam pohïing u Amit Shah.”
“U DK Shivakumar bad u Siddaramaiah ki la buh ka jingdawa ba la dei ban khang noh ïa ka seng PFI, hynrei u Myntri Rangbah jong ka jylla u Basavaraj Bommai um shym la leh ei ei. Naba ka seng BJP ka la sngewthuh ba ka la shah rem, ha kaba ka la hiar sha ka 40 tylli ki konstitwensi, ka la sdang ban duh mynsiem. Mynta ka la ïaleh ban kren ïa ki kyntien kiba thok ba shukor bad ruh ban kynnoh bymhok ïa kiwei pat,” u la ong.
U la bynrap shuh shuh da kaba ong ba ka seng jong u ka la buh da ka jingmudui ejahar hapoh ka kyndon 153 A, 171 G, 505(2) bad 123 jong ka Indian Penal Code.
