New Delhi, ïaïong:
Ka India haduh mynta ka la lah ban pyllait im ïa kumba 670 ngut ki nong India na Sudan bad mynta ka dang ïaid shakhmat na ka bynta ban ïoh pyllait im shuh shuh ïa kiwei pat ki nongshong shnong jong ka ri na katei ka ri kaba don mynta hapdeng ka thma ha shwa ba ka jingsangeh ïasiat kan kut ïa kaba la mynjur hapdeng ki ar kynhun ki shipai.
Ka C-130J kaba dei ka liengsuiñ thma jong ki shipai ka tnat Indian Air Force ka la kit sha Jeddah ïa ki 392 ngut ki nong India na Port Sudan ha ki lai tylli ki liengsuiñ ha ka sngi Balang, shi sngi hadien ba ka jhad jong ki shipai duriaw ka la lah ban pyllait im ïa ki 278 ngut ki nong shong shnong jong ka ri na Sudan.
Baroh ki nong India kiba la shah pyllait im na Sudan ki la don 670, kumba la ïoh lum jingkheiñ.
“Ha ka miet jong ka sngi Balang ka kynhun kaba nyngkong jong kiba la shah pyllait im ki la poi ha New Delhi na Jeddah ha ka liengsuiñ. Ki shipai hapoh ka jingtreikam jong ka ‘Operation Kaveri’ ka la lah ban wanrah ïa kumba 360 ngut ki nong India naba ka liengsuiñ kaba nyngkong ka la lah ban pynpoi ïa ki ha New Delhi,” la ong u Myntri korbar ri u S Jaishankar ha ka jingpyllait khubor lyngba ka Tweeter.
Da ka jingpyntreikam ïa ka ‘Operation Kaveri’, ka India ka la lah ban pyllait im na Sudan sha ka nongbah jong ka Saudi Arabian jong ka Jeddah ha kaba ki la lah ban leit phai ïing.
“Kane ka jingpyntreikam haduh mynta ka dang ïai bteng. Ka kynhun kaba saw jong ki nong India ka la mih na Port Sudan ban leit sha Jeddah. Ka liengsuiñ jong ki shipai ka tnat IAF ka C-130J ka la kit ïa ki 136 ngut ki nong India,” la ong u nongaiktien jong ka tnat korbar ri u Arindam Bagchi ha ka jingphah khubor lyngba ka Twitter ha ka miet jong ka sngi Balang.
Ka India ka la buh ka jaka ha Jeddah na ka bynta ban pynmih ïa ki nong India bad u Myntri khynnah jong ka tnat korbar ri u V Muraleedharan u la khmih bniah ha kaba ïadei bad ki rukom pyntreikam na ka bynta ban pynphai ïa ki nong India na ka nongbah jong ka Saudi Arabia.
Ka kynhun kaba nyngkong jong ki 278 ngut ki nong India ka la mih na Port Sudan da ka jhad jong ki shipai duriaw ka INS Sumedha ha ka sngi Ba-ar.
Katkum ka jingïathuh jong u Jaishankar, la ong ba ka liengsuiñ C-130J ka la kit sha Jeddah ïa ki 121 ngut ki nong India katba ka liengsuiñ kaba ar ka la kit ïa ki 135 ngut ki nong India.
Ka India ka la shim ïa ki sienjam na ka bynta ban pyllait im ïa ki nong India na Sudan naba ka la don ka jingmynjur ban sangeh ïasiat da 72 kynta hapdeng ki shipai Sudan bad ki shipai ka kynhun Rapid Support Forces (RSF) hadien ba ka la don ka jingïakren.
Kumba la ïathuh ka tyllong khubor, la ong ba ka liengsuiñ C-17 ka la mih ban leit sha Jeddah ha ka sngi Balang na ka bynta ban kit ïa ki nong India na Jeddah sha Mumbai. Kumba la sakhi, la ong ba ki la don kumba 400 ngut ki briew kiba la ïap na ka jingïasiat kitei ki kynhun shipai.
