Jammu, ïaïong:
Ka surok bah Jammu-Srinagar ka la shah khang lynti hynnin ka sngi hadien ba ka la don ka jingtwa khyndew ha Ramban distrik, ha kaba ka la pynlong ïa palat 300 tylli ki kali ba kin sahkut lynti, la ïathuh ki heh pulit.
Ka jingtwa khyndew ka la jia ha ka thaiñ Shalgari jong ka distrik, ha kaba ka la shah ktah jur na ka jingther jong u slap, ki la ïathuh.
Ki la don palat 300 tylli ki kali ïa kiba la sahkut lynti ha kiba bun ki bynta jong ka surok kaba jrong kumba 270-km, kaba long tang kane hi ka surok kaba la pynïasoh bad kiba bun ki surok bad ka Kashmir sha kiwei pat ki bynta jong ka ri, la ïathuh shuh shuh ki heh pulit.
Ki la ong ba ka jingpyntreikam haduh ba la thoh ïa ka khubor ka dang ïai bteng na ka bynta ban pyllait lynti, hynrei ka jingïai bteng jong ka jinghap slap ka la buh jingeh ïa ki kynhun pulit ba kin pyntreikam ha Ramban-Banihal Sector ha kaba la ïaleh katba lah ban trei shitom na ka bynta ban pyllait ïa ki kali kiba la sahkut lynti.
Ki pulit bad ki kynhun ïarap kum ha kine ki jingjia ba ju jia na ka jingthombor ki bor mariang, ki la ïai bteng ban pynkhuid ïa ka jingtwa na ka surok bah. Kane ka kam jong ki ka la ïai bteng wat lada ka la jur ka jinghap jong u slap khnang ban ïoh pyllait kham kloi ïa ka jingsakut ki kali.
“Ka jingïai bteng jong ka jinghap ki maw ka la khanglad ïa ki kali ba kin ïaid ha Shalgadi, hajan Banihal. Ki la don ki jingpynbeit na ka bynta ban ai jaka sah shipor ïa ki nongleit jingleit kiba la sahkut lynti,” la ong u Deputy Commissioner jong ka Ramban ha ka jingthoh kaba u la phah lyngba ka Twitter.
Ki pulit ha ryngkat ka jingïatreilang jong ki shipai ki la bthah ïa ki nongleit jingleit kiba la sahkut lynti ba ki dei ban bud ïa ki kyndon ba la buh bad ban shim ki lad jingïarap ba la pynbiang.
Ki paidbah ki la shah bthah ba kim dei ban mih ha ka ban leit jingleit lyngba katei ka surok bah khlem ka jingtip jong ki pulit pynïaid kali, la ong ki heh pulit.
