Kolkata, ïaïong:
Ka jingpom pyrthat ka la shim ïa ka jingim jong ki saw ngut ki briew ha Purba Bardhaman distrik, bad mar ar ngut ha Murshidabad bad North 24 Parganas, la ïathuh u heh pulit.
Haduh ba la thoh ïa ka khubor ki la don baroh kumba 14 ngut ki briew kiba la ïap ha ki lai tylli ki distrik jong ka West Bengal, ha kaba la sakhi ba ka la don ka jinghap jong u slap ha ka sngi Palei, la ïathuh shuh shuh u heh pulit.
Ki heh pulit jong ka West Bengal ki la ong ba ki la don shuh sa kumba 6 ngut ki briew ïa kiba la ïoh jingtip ba ki la ïap na kum kane ka jingjia kiba na Paschim Midnapore bad Howrah Rural distrik.
“Mar lai ngut la ïoh jingtip ba ki dei na Paschim Midnapore bad Howrah Rural,” la ïathuh u heh pulit.
Katkum ka jingïathuh jong u heh pulit, la ong ba kiba bun na kine ki lanot ha ka jingjia ki dei ki nongrep ha kaba ki la ïap hadien ba ki la shah pom pyrthat katba ki dang trei ha ki lyngkha jong ki.
Ka jingjur slap ha ryngkat ka jingthaba ka ‘leilieh bad ka jingtied u pyrthat ka la don ha ki distrik kiba shaphang Shathie jong ka Bengal kiba kynthup ha Kolkata, Howrah, North 24 Parganas, Purba Bardhaman bad Murshidabad, u la ong.
Kane ka jinglong jingman jong ka suiñbneng ka la ktah jur ïa kiba bun ki nongshong shnong ha katei ka thaiñ hi baroh kawei.
