Kolkata, ïaïong:
Kiba bun na ki bos jong ki riewshimet kim shym la kamai, ki dukan bad ki ïew kiba don ha kylleng ki thaiñ ki la khang lut namar ka jingdon jong ka pakhang shnong kaba 12 kynta ba la khot pynlong da ka seng BJP ha ki distrtik kiba don ha Northern West Bengal hynnin ka sngi.
Ka seng BJP ka la khot pynlong ïa ka pakhang shnong ha ki phra tylli ki distrik kiba don ha ki bynta ba shaphang Shatei jong ka jylla kum shi bynta ban ïakhih halor ka jingdon ka jingpynshitom beiñ ïa ki riewlum bad halor ka jingïap jong u dkhot jong ka seng kumba la pynshisha ba u la ïap na ka daw ba u la shah siat ha ki pulit. Kane ka pakhang shnong ka la sdang naduh ka por 6 baje mynstep ha kaba la ïohi ïa ki nongbud jong ka seng BJP ba ki la ïamih paidbah ha ki surok bad ki lynti ki synkien kiba don ha ki lad na ka bynta ban khang ïa ki kali kiba thmu ban ïaid ha ki surok.
Ki la pynlong ruh ïa ka jingïaid paidbah kum shi bynta ban ai ka jingkyrshan ïa ka jingkhot pakhang shnong.
Ha Cooch Behar distrik, wat lada ki la don ki bos sorkar kiba la treikam, ki bos jong ki riewshimet kim shym la mih ha ki surok ha ka por mynstep.
Ha Jalpaiguri distrik, kiba bun ki dukan ki la khang lut. Ha Kadamtala, ki nongkyrshan halor ka pakhang shnong ki la leh da ka bor ban phah sangeh treikam ïa ki bus sorkar kiba treikam bad ïaid ha ki surok.
Kumba la ïoh jingtip la ong ba ki la don ki jingïakynad kiba la mih ha kiwei pat ki distrik jong ka thaiñ. Ka thaiñ North Bengal ka kynthup ïa ka Cooch Behar, Jalpaiguri, Alipurduar, Darjeeling, Kalimpong, North Dinajpur, South Dinajpur bad ka Malda distrik.
Ha ka sngi Palei ha ka por ba la pynbna ïa ka jingkhot pakhang shnong, u President jong ka seng BJP ha ka jylla u Sukanta Majumdar u la kynnoh ïa ka Mamata Banerjee kaba la ïalam ïa ka sorkar Trinamool Congress ba kam shym la lah ban tehlakam ïa ki kam pyntriem bad ong ba kam shym la khmih bniah kum ka nongsynshar.
Ka rai kaba la pynlong ban khot pynlong ïa ka jingïakhih ka long halor ka jingïap jong u nongbud jong ka seng BJP u Mrityunjay Burman ha Radhikapur hajan Kaliaganj kaba don ha North Dinajpur distrik. Ka seng BJP ka la kynnoh ba u Mrityunjay u la ïap ha ka jingshah siat ha ki pulit ha ka miet jong ka sngi Balang.
Kumba la ïathuh la ong ba ka Kaliaganj kaba don ha North Dinajpur distrik ka la don hapdeng ka jingkhihwin naduh ka jingjia jong ka jinglap ïa ka metïap jong uwei u khynnah pule na nala ha ka taïew ba la lah. Shuh shuh nalor kane, ka jingsaphriang jong ka video jong ka jingshah paring ka metïap jong kawei ka khynnah ka la ktah ïa ki ba bun.
Nalor kane la ïathuh ba ha ka sngi Ba-ar, ka jingïakhih jong ki riewlum pyrshah halor kine ki jingjia ka la kylla long ka jingïakynad kaba jur bad ka jaka treikam jong ki pulit kaba don ha Kaliaganj ka la shah thang bad kiba bun ki kali ki la shah thang bad ha kaba ïadei bad ha kane ka jingïakynad ki la don kumba katto katne ngut ki pulit kiba la mynsaw.
Ki nongïakhih ki la ïakhun pyrshah bad ki pulit ha kaba kane ka la pynlong ïa ki pulit ba ki siat da ki tyndong lyer pynsat khmat pyrshah ïa ka kynhun jong ki nongïakhih.
Ka la don ka jingpynjari da ka kyndon 144 jong ka Criminal Procedure Code bad ka la don ruh ka jingpynsangeh treikam ïa ka Internet haduh ka 30 tarik, Ïaïong ha ki saw tylli ki Ward jong ka thaiñ Kaliaganj Municipal kum shi bynta ban khanglad ïa kino kino ki jingjia kiba ktah bad pynduh ïa ka shongsuk-shongsaiñ ha ka jylla.
