Mumbai, ïaïong:
Ki la don ar ngut ki nonghikai jong ki Pre-school kiba la shahkem ha ka sngi Balang halor ka jingshah kynnoh ba ki la pynshitom beaiñ bad shoh ïa ki khynnah rit.
Kine ar ngut ki nonghikai ki la shah mudui ha shwa lai taïew bad ïa ka jingkyrpad pyllait jamin ba shipor na ka bynta jong ki la kyntait da ka Bombay High Court ha ka Lah Sngi U Blei, kata ha ka 24 tarik, Ïaïong, la ïathuh ki pulit jong ka Kandivali.
Kine ki nonghikai ki dei kiba la tip kyrteng kum ka Jinal Cheda, 40, bad ka Bhakti Shah, 32, jong ka Rhymes n Rumbles ha Kandivali West, ïa kine la ïalam hakhmat ka Borivali Metropolitan Magistrate Court ha ka sngi Palei bad la set shi sngi ïa ki na ka bynta ban pynlong ka jingtohkit.
Ki pulit ki la ong ba ki la khmih bniah ïa ka video ba la ring bad ai da ki kmie ki kpa bad ki la kem noh ïa kine ki nonghikai. “Ngi pynpaw ka jingsngewnguh ba ha ka sien jam kaba nyngkong la pyntreikam halor kane na ka bynta ban pynïoh ïa ka jingbishar bahok,” la ong u Kaushal Dinesh Zaveri, 35, uba la buh ïa ka jingujor ejahar ha ka 2 tarik, Ïaïong.
U Zaveri, uba la trei ha ka Asian Paint ha Goregaon, u la ong ba kine ki arngut ki nonghikai ki la pan jingbit ha ka ban pyllait jamin shipor ïa ki na ka Sessions Court bad ka High Court. Baroh ar tylli kine ki ïingbishar ki la kyntait ïa ka jingkyrpad jong ki.
U heh pulit u la ïathuh ba ha u bnai Nailur jong u snem 2022, ka Cheda ka la plie ïa ka Preschool ha ryngkat ka jingïatreilang bad ka Meghna Joshi, 43, bad u Viraj Upadhyay, 48.
Ka Cheda ka la hikai ruh ha kane ka skul, ha ryngkat ka nongïarap jong ka ka Bhakti, ki la don ruh arngut ki nongïarap ban khmih bniah bad pynbiang ïa ki jingdonkam jong kine ki khynnah rit ïa kiba la tip kyrteng kum ka Mangla bad ka Sandhya.
“Ngi la buh jingthoh halor ki jingphla jong baroh ki nongtrei jong ka skul bad jong ki kmie ki kpa ha kaba ngi la pynkhreh ban buh da ka jingmudui pyrshah ïa kine ki arngut ki nonghikai,” la ong u heh pulit.
U Zaveri u la leit sha ki pulit ban leit ujor ba ki nonghikai jong katei ka skul ki la leh tohmet bad leh bym salia ïa u khun jong u bad ïa kiwei pat ki khynnah.
U Zaveri u la ong ba u la pynrung kyrteng ïa u khun jong u ha kane ka skul na ka bynta ban shah hikai da kumba ar kynta ha ka shi sngi, ha u Risaw jong u snem ba la lah.
U Zaveri u la ong ba um shym la poi pyrkhat ban khmih bniah ïa ka rukom long jong kane ka skul, ka rai ban phah ïa u khun ha katei ka skul ka long beit kumba la twad jingmut na kiwei pat ki kmie ki kpa ha kaba um tip ïa ka jinglong jong kitei ki nonghikai.
U la ïathuh shuh shuh ba haba u khun u la sdang ban leit skul, u la don ka jingsheptieng ïa ki bor jingsawa bad ipher ka jinglong jong u, baroh hapoh ïing ki pyrkhat ba u la shah pyndik ha ki para khynnah ba ïapule lang. U la hap ban shah pynbor ban leit sha skul bad um don ka mon ban pule kot ba la ithuh ba u don ka jingtieng.
Haba u Zaveri u la ïohi ïa kane, u la ong ba u la twad jingmut na ki kmie ki kpa jong kiwei pat ki khynnah, ha kaba kine ki la ïathuh ba ki la lap kumjuh ïa ki khun jong ki, ha kaba kane ka la pynlong ïa ki kmie ki kpa ba kin dawa ba dei ban pyni ïa ki Record lyngba ki CCTV ba la buh ha ki kamra klas.
“Nga dap da ka jingkyndit ban ïohi ba kine ki arngut ki nonghikai, ka Cheda bad ka Shah ba ki la shoh ïa kine ki khynnah rit bad bret ïa ki ha madan. Ki ju shyit eh ïa ki ngab jong ki bad tied ruh da ki kot lada jia ba ki kum pynhap ha madan. La paw ruh ba ki la shoh ïa uwei u khynnah ha kaba kiwei pat ki la tieng la kyiuh katba ki dang peit bad ïohi ïa kane,” la ong u Zaveri.
Hadien ba la dep peit bad ïohi ïa ki Recording jong ka CCTV, u Zaveri bad kiwei pat ki kmie ki kpa ki la leit sha ki pulit ban leit buh jingujor.
Ha ka 2 tarik, Ïaïong, ki arngut ki nonghikai ki la shah pynngat hapoh ka kyndon 23 jong ka Juvenile Justice Act 2000.
