Kolkata, Jymmang:
Uwei u nongbud jong ka seng Trinamool Congress uba la 40 snem ka rta u la ïap bad kumba 25 ngut kiwei pat ki la mynsaw na ka jingshah pom pyrthat ha ka por ba la don ka jingther jong u slap ha ka sngi U Blei ha Bankura distrik kaba don ha West Bengal, la ïathuh ki pulit. Kane ka jingjia ka la jia ha ka por ba ka la don ka jingïalang paidbah ba la pynlong da ka seng ha ka por ba la ai jingkren da u General Secretary jong ka seng u Abhishek Banerjee ha Indas.
U Saber Mallick, uba la ïashim bynta ha ka jingïalang paidbah kaba la long ha ka sngi U Blei, u la shah pynkit sha ka jaka ai jingsumar hadien ba u pyrthat u la pom ïa uwei u dieng uba don ha katei ka jaka ba la pynlong ïa ka jingïalang paidbah, hadien katto katne por ki nongsumar ki la pynbna ba u la khlad noh, la ïathuh u heh pulit.
“Ki la don kumba katto katne ngut ki nongbud jong ka seng TMC kiba la rieh slap ha utei u dieng ha ka por ba ka la don ka jinghap slap. U Mallick u la ïap noh katba 25 ngut kiwei pat ki la mynsaw na ka jingshah pom pyrthat,” la ong shuh shuh u heh pulit.
Ki la don kumba 7 ngut na ki 25 ngut ki briew kiba la mynsaw kiba la shah pynkit sha Burdwan Medical College and Hospital ha kaba la ong ba kine ki la kham shitom jur, la ïathuh u heh pulit.
“Ka jingsngewlem jong ngi ka leit sha kito kiba la shah ktah ha ka jingjia pom pyrthat ha Indas. Ngi pynpaw ka jingsngewlem sha ki bahaïing jong une uba la khlad noh ha ka jingjia bad ba ngin sa ïaleh katba lah ban ai ka jingkyrshan na ka bynta jong ki. Ngi dang bteng ban khmih bniah halor ki jinglong jingman bad trei bad ki heh nongpynïaid jong ka thaiñ na ka bynta ban pynbiang ïa ki lad ai jingsumar sha kito kiba la mynsaw,” la ong ka jingthoh ba la wan na ka seng lyngba ka Twitter.
U nongïalam jong ka kynhun ki samla jong ka seng TMC u Debangshu Bhattacharya, uba la ai jingkren ha ka jingïalang paidbah ha ka por ba la jia katei ka jingjia, u la mareh pynsted sha ka jaka ba la jia ka jingpom pyrthat.
“Ngi baroh ngi la don hapdeng ka jingkyndit. U nongïalam jong ngi u Abhishek Banerjee u la bthah ïa ngi ba ngin ai jingïarap ïa ki briew kiba la mynsaw bad sha ki dkhot jong ka longïing jong une uba la ïap. Ngi la ïaleh katba lah ban pynïoh ki jingsumar na ka bynta kito kiba la mynsaw,” la ong u Bhattacharya.
Ka jingpynlong ïa ka jingïalang paidbah ha Indas ka long shi bynta ka prokram jong ka ‘Trinamooley Nabajowar’ (ka dak kaba thymmai ha ka seng Trinamool), ïa kaba la pynlong da u Banerjee hashwa ban pynlong ïa ka ilekshon Panchayat.
