New Delhi, Jymmang:
Ka sorkar kmie ka la khang ïa kumba 14 tylli ki Messenger Mobile Application kiba la pyndonkam da ki lehnoh ha Pakistan kum ki lad ba ki ju pyndonkam ban ïakren bad ai jingtip sha Jammu & Kashmir.
Kumba la ïathuh ka tyllong khubor, la ong ba ki Apps ha kaba ka sorkar kmie ka la khang ki kynthup ïa ka Crypviser, Enigma, Safeswiss, Wickrme, Mediafire, Briar, BChat, Nandbox, Conion, IMO, Element, Second Line, Zangi, Threema napdeng kiwei pat.
La lap ba ïa kine ki Apps la pyndonkam da ki lehnoh ha Kashmir na ka bynta ban ïakren bad ki nongkyrshan jong ki kiba dei ki nongïarap jong ki lehnoh ne ki On-Ground workers (OGW), la ïathuh ka tyllong khubor.
Ka jingpyntreikam jong ka sorkar ha ka ban khmih bniah bad ïakhun pyrshah ïa ki Apps ha ki Mobile ka la long namar ba ka la don ka jingbuh jingma bad ka jingbym shngaiñ jong ka ri ha kaba lyngba kine yn lah ban wanrah ïa kiba bun ki kam pyntriem.
Hashwa, ka sorkar India ka la dep ban khang ïa kiba bun ki Chinese Apps, ha kaba la kynnoh ba ki la buh jingma ïa ka ri ha kaba ïadei bad ki lad ïada ri, bad ka jingshngaiñ ha ka imlang ka sahlang.
