Raipur, Jymmang:
Ki lehnoh Maoist hynnin ka sngi ki la thang ïa ar tylli ki trok kiba la pyndonkam ha ka ban kit jingkit ha kawei ka jaka ba dang shna jingshna ha ka thaiñ Ittapara jong ka Sukma distrik, la ong u SP jong ka Sukma, u Sunil Sharma.
Kane ka jingjia ka la jia ha ka thaiñ kaba hap hapoh ka jingkhmih jong ki pulit ka Phulbagdi. Hadien ba la ïoh jingtip halor kane ka jingjia, u District Reserve Guard team (DRG) u la poi ha katei ka jaka.
Kumba la ïathuh u SP Sharma, la ong ba ki la don kumba lai ngut ki nongtrei ha katei ka jaka kiba la lait im khlem kano kano ka jingshah pynmynsaw bad ïa kine la ïalam noh sha ka jaka treikam jong ki pulit.
Hashwa kane ka jingjia, kata ha ka sngi Thohdieng, ki la don kumba saw ngut ki lehnoh Maoist kiba la leit ban pyndem ïalade hapoh ka jingtreikam jong ka ‘Puna Nakom Abhiyan’ jong ka sorkar Chhattisgarh.
Shuh shuh la ong ba kane ka jingjia ka la jia ruh hadien ka jingshah hiar thma jong ki shipai ka kynhun DRG ha kaba ki la don kumba 10 ngut kiba la ïap hadien ka jingshah thombor ha ki lehnoh ha Dantewada kaba don ha Chhattisgarh.
“Ïa ki lehnoh kiba la leit pyndem wait la tip kyrteng kum u Gaddon Ramesh (u dkhot jong ka DAKMS), u Kursam Bhima (u dkhot ka Militia),u Madkam Saara ( u President jong ka Janathan Sarkar Sakler RPC), u Madvi Ganga (u dkhot jong ka kynhun Militia),” la ong ka jingthoh. Baroh kine ki Maoist kiba la leit ban pyndem ki dei ki nongshong shnong jong ka Kistaram, Sukma bad ki la treikam hapoh ka seng ha ki 4 haduh 5 snem ba la leit.
Ki shipai ki dang pynkhlaiñ ïa ka jingpahara bad pynlong ïa ka jingleit thwet lehnoh ha katei ka thaiñ khnang ban ïohkem ïa ki lehnoh kiba la donkti ha ka jingjia.
