Bengaluru, Jymmang:
Ka seng Congress, ha ki mat pyntreikam jong ka na ka bynta ka ilekshon Assembly ha Karnataka, ka la ong ba kan sa khang ïa ki seng kum ka Bajrang Dal bad PFI kiba ju pynsaphriang ïa ki khubor jong ka jingïashun hapdeng ki jait bynriew.
“Ka seng Congress ka la rai ban weng ïa ki jingeh bad shim ïa ka rai ban leh ei ei pyrshah ïa ki briew ne ïa ki seng kiba ju pynsaphriang ïa ki khubor jong ka jingïabuhshun hapdeng ki kynhun jaitbynriew ne ha ki niam. Ngi ngeit ha ka aiñ bad ha ka Riti synshar ha kaba la ong ba ym dei ban pynkheiñ da ki briew ne ki seng kumba leh ka Bajrang Dal, PFI ne kiwei pat kiba ju ïaleh ban wanrah bad pynsaphriang ïa ki khubor jong ka jingïashun hapdeng ki kynhun kiba khraw bad kiba rit paid. Ngin sa pynshitom da kaba tyngeh naba katkum ka aiñ la kynthup lang ha ka ban khang ïa kum kine ki jait seng,” la ong ka mat treikam jong ka seng.
Ha kaba ïadei bad kane, la ong ba ka sorkar kmie ka la dep ban khang ïa ka seng PFI. Ka thong kaba mynta ka long ban bteng ïa ka kam.
Ka seng Congress ka la kular ruh ban weng noh ïa baroh ki aiñ ki bym ai jingmyntoi bad kumjuh kiba long pyrshah ïa ki aiñ jong ki briew ïa kiba la pdiang da ka sorkar BJP ha ka jylla hapoh shi snem lada ka wan ha ka bor synshar.
Ka la kular shuh shuh ruh da kaba ong ba kan sa ai pisa kaba T. 2,000 klur na ka bynta ban pynthymmai ïa baroh ki rukom pyntreikam ha ki ïingbishar kiba don hapoh ka jylla.
Ka seng Congress ka la pynbna ruh ba kan sa pynmih ïa ka skulbah halor ka jingwad bniah ha Kanakapura, ki Special Fast Track Courts na ka bynta ban bishar bniah halor ki jingjia ba ïadei bad ki kam thombor jong ki lehnoh bad ki jingjia kiba kham shyrkhei kum ka jingleh beijot, ka jingthombor ïa ki kynthei da kaba theh acid bad kiwei pat.
Ban bynrap shuh shuh halor kane, la ong ba ka seng Congress ka la kular ban thaw ïa ki rukom pyntreikam na ka bynta ban pyrkhing bad tehlakam ïa ki On-line Loan apps, hapoh ki 100 sngi lada ka wan ha ka bor synshar.
