Bengaluru, Jymmang:
Kum shi bynta ban pyntreikam ïa ki skhim ba bun kiba long halor ka jingthmu ban ai ka jingkyrshan ïa ki nongshong shnong jong ka jylla, u Myntri Rangbah jong ka Karnataka u Basavaraj Bommai u la khmih bniah na ka por sha ka por ha kaba ïadei bad ka jingtreikam jong ki skhim khnang ban pyntikna ha ka ban pynïoh jingïarap sha kito kiba donkam.
Ha kaba ïadei bad ka jingthmu ban nang kyntiew ïa ka jylla ha kiba bun ki liang, u Myntri Rangbah u la ïai bteng ban khmih bniah ha kaba ïadei bad kiba bun ki jingthmu ban wanrah ïa ki kam pynroi hapoh ka jylla.
U Myntri Rangbah u la dep ban pynbna ïa kiba bun ki jingthmu pyntreikam kiba kynthup ha kaba ïadei bad ka jingpynbiang jingïarap pisa sha ki 10 lak ngut ki briew khnang ba kin lah ban ïeng hala kijong ki kjat. Ka sorkar kan sa ïarap ïa ki ha ka ban pynpoi ïew ïa ki mar rep kumjuh ïa ki Stree Shakti Self-Help Groups (SHGs).
Ha ka jingïakren bad ki nongthoh khubor, u Bommai u la ong ba un sa ïarap ïa ki briew na baroh ki kynhun, kynthup ïa kiba hapoh ka SC/ST, ki longkmie, ki kynhun treikam jong ki bynta ba bun, ki nongrep bad kiwei pat, khnang ban pynkhlaiñ ïa ki bad ban lah ban pynlong ïa ka jylla ba kan roi kan par.
Ban nang pynkhlaiñ shuh shuh ha kaba ïadei bad ki SHGs ba la pynïaid da ki kynhun jong ki longkmie ha ki thaiñ nongkyndong, ka sorkar jylla kan sa ai jingïarap pisa kaba T. 1.5 lak sha kawei ka kynhun hapoh ka prokram kaba kyrpang.
Ki la don kumba 33,000 tylli ki SHGs ha Karnataka ïa kiba la ïasoi soskular bad ki Bank. Kine ki kynhun kin sa ïoh jinghikai pyntbit bad ka kam, bad ban pynkiew ïew ïa ki mar jong ki bad ban soi ruh ïa ka MoUs.
Kane ka jingpyntreikam kan sa ai jingmyntoi ïa kumba 5 lak ngut ki longkmie ha kylleng ka jylla. Ka sorkar ka la don jingthmu ban nang pynïar shuh shuh ha kaba ïadei bad ki kam ki jam ki ban kyrshan ïa ki samla shynrang hapoh ka jingtreikam jong ka Swami Vivekananda Yuvashakti Yojane. U Bommai u la pynpaw ka jingsngewnguh ïa ki nongbud jong ka seng bad ki nongïalam ruh kumjuh, bad pynpaw ka jingsngewtynnad ïa ka kynhun Myntri kiba la treilang na ka bynta ban nang pynbha ïa ki kam jong ka sorkar.
