Pynkut ka India ïa ka jingïakhun pyrshah ïa ki Maoist

New Delhi, Naiwieng:  U Myntri Rangbahduh ka ri, u Narendra Modi, u la ong ba ki jaitbynriew riewlum, ki la mad jingeh bha na ka jingshah thombor ha ki Naxal bad ki la shah kyntait...

New Delhi, Naiwieng: 

U Myntri Rangbahduh ka ri, u Narendra Modi, u la ong ba ki jaitbynriew riewlum, ki la mad jingeh bha na ka jingshah thombor ha ki Naxal bad ki la shah kyntait wat ban thep vote, ha ki jaka ba la shah ktah ha ki Maoist, katba ki sorkar barim, ki la iehnoh ïa ki, ba kin ïada ïalade, ong ka tyllong khubor ha kine ki khyndiat sngi ba la leit.

Haba ai jingkren ha ka prokram Janjatiya Gaurav Diwas kaba rakhe ïa ka jingdap 151 snem jong u nongïaleh laitluid riewlum u Birsa Munda ha ka sngi U Blei, u Modi u la pynpaw ruh ïa ki jingthmu jong ka sorkar na ka bynta ka bha ka miat bad ka roi ka par na ka bynta ki jaidbynriew riewlum bad u la khot ïa ka jingpyrshang lang ban tei ïa ka ri India kaba kiew shaphrang. U Modi u la ong ba ka jinglong jingman naduh katei ka por ka la kylla da kaba pynduh noh ïa ki kam thombor jong ki Maoist.

Ki kynthei riewlum mynta ki ïaroh ïa ka sorkar namar ba ki sngew shngaiñ, katba ki khynnah kiba la shah ktah ha ka jinglong khynnah jong ki ha ka jingshah thombor ki ïoh ïa ka jingnang jingstad bad ka lad kamai, u la bynrap.

Ka jingïakhun jong ki  pulit pyrshah ïa ki Maoist ka la ïai bteng ha kaba kumba la sakhi ha ka jingjia ha Polavaram distrik, ha ka jingïatreilang bad ka Central Reserve Police Force (CRPF), ki la lap ïa kawei ka jaka buhrieh tiar pynbthei kaba heh bha jong ki Maoist ha khappud jong ka Andhra Pradesh bad Chhattisgarh ha ka por ba ki pynlong ïa ka jingkhynra ba kyrpang.

Katkum ka jingpynbna pathai khubor ba la pynmih ha ka sngi Balang, ki pulit, da kaba treikam katkum ki jingtip shaphang ki tiar pynbthei ba la kynnoh ba la buhrieh da u heh ka kynhun lehnoh Maoist, u Madvi Hidma ha u snem 2025, ki la pynlong ïa ka jingkhynra hapdeng ki Jylla ryngkat bad ki briew jong ka CRPF.

U SP K Chakravarti u la thaw ïa ka kynhun ba kyrpang na ka bynta ban treikam bha halor kane ka bynta khnang ba lap dien shuh shuh ïa kum kine ki jaka.

Ki pulit ki la ïathuh ba ki Maoist ki la kynnoh ba ki la buhrieh ïa ki tiar pynbthei ban thmu ïa ki bor pahara bad ki nongïalam saiñ pyrthei.

U la ong ba ki pulit kin pynjur ïa ka jingkhynra ban wad ïa kiwei pat ki jaka theh ñiut jong ki Maoist ha Polavaram.