Kolkata, Jymmang:
Ka Myntri Rangbah jong ka West Bengal ka Mamata Banerjee ka la ïai ban halor ka jingong ba ka nongrim jong ka ka ïeng ha ka liang pyrshah, ha kaba ka la ong ba ka la dei ban don ka jingïakhun pyrshah ïa ka seng BJP bad ban pynkyllem noh kum ka sorkar kmie, ïa kane ka la kren ha ka sngi Thohdieng.
“Baroh ki seng ka liang pyrshah ki la dei ban ïatylli. To ngin ïakhun markhmat bad ka seng BJP. Lada don mano mano kiba kham khlaiñ ki la dei ban ïakhun pyrshah ïa ka BJP ha ka jaka jong ki. Ngan jin da la kmen lada ka BJP ka sdang ban khyllem na ka jingïakhun ïa ka ilekshon ha Karnataka ka ban sa long shen ha kine ki sngi ban wan,” la ong shuh shuh ka Mamata ha ka jingai jingkren jong ka ha ka jingïalang paidbah kaba la long Shamsherganj kaba don ha Murshidabad.
Ka Myntri Rangbah ka la leit ban jngoh ïa ki jaka kiba la shah ktah jur na ka jingshah rong noh ka khyndew kiba don ha rud ka wah Ganga.
Ka la pynshisha da kaba ong ba ka sorkar kmie kam shym la lah ban siew ïa ka ram jong ka Bengal kum shi bynta na ka jingbuhshun ha ki kam saiñ pyrthei.
“Ka sorkar kmie kan ym ai pisa ïa ngi haduh ka ilekshon 2024 ngi la ïakhun pyrshah ïa ka seng BJP,” la ong ka Mamata.
Ka la kynthoh jur ruh ïa ka sorkar kmie halor ka jingkynnoh ba ka la pyndonkam bakla ïa ki kynhun tohkit pyrshah ïa ki dkhot jong ki seng ka liang pyrshah, ka la ong shuh shuh.
Ka Mamata dang shen ka la ïakynduh ïa ki nongïalam ka liang pyrshah, kynthup ïa u heh nongïalam jong ka seng Samajwadi Party u Akhilesh Yadav, u Myntri Rangbah jong ka Bihar u Nitish Kumar bad ïa u Symbud Myntri Rangbah jong u u Tejaswi Yadav ha Nabanna, kaba dei ka State Secretariat, bad ka la pynpaw ïa ka jingangnud jong ka na ka bynta ka jingïakynduh lang jong ki seng ka liang pyrshah hashwa ban pynlong ïa ka ilekshon 2024.
Ka la ïakynduh ruh bad ka Sonia Gandhi ha Delhi. Hynrei ka jingïadei jong ka bad ka seng Congress ka la blad noh bad kane ka la paw pyrthei hashwa ban pynlong ïa ka ilekshon ha Goa.
Katkum ka kaiphot ba la ïohlum, la ong ba ki la don kumba laingut ki nongrep kiba la pyndkut hi ïala kajong ka jingim hapdeng ka 10 tarik, Lber bad 29 tarik, mynta u snem namar ka jingkit ram jong ki.
