Amaravati, Jymmang:
Ha ki bnai ba la leit, kawei ka thaiñ kaba don ha Anantapur distrik ka la ïoh jingkheiñ ba ki la don kumba 11 ngut ki nongrep kiba la pynïap hi ïalade.
Ki heh nongpynïaid distrik, ki la pynshisha halor kane ka jingbuh jingkheiñ, hynrei la ong ba ka lah ban don jingïapher tang khyndiat eh.
Kumba ki la ïathuh, la ong ba ki la don kumba 12 ngut ki nongrep kiba la ïap da kaba dkhat julor ïa la ka jingim ha kawei na ki jaka ba jur ka jingrang tyrkhong kaba hap ha ka thaiñ Kuderu naduh u Kyllalyngkot jong u snem 2021.
Nalor kane, ka jingban ha ki jingmut jingpyrkhat jong ki na ka jingkit ram, ka jingjulor jong ki jingthung namar ka jingshah thombor ha ki bor ka mariang, ka jingduna um na ka bynta ban ai sha ki jingthung, ka jingrang tyrkhong bad ka jinghiar palat ka dor halor ki mar rep ka la pynlong ïa kine ki nongrep ba kin shim da kane ka rai naba ki la dap da ka jingkut lad.
Ha ka 29 tarik, Lber jong une u snem, uwei u nongrep ïa uba la tip kyrteng kum u Ranganayakulu u la pyndkut noh ïala kajong ka jingim naba um shym la lah ban siew ïa ka ram kaba u la shim. Une u briew u la rep soh Pomegranate ha ka jaka kaba la jan don 11.5 akar hadien ba u la shim wai ïa ka jaka.
U la pynlut ka pisa kaba palat ïa ka T. 22 lak na ka bynta ki jingthung jingtep ha kaba la khmih lynti ban ïoh nong kham bun.
Ha ka jingsniew bok, ki khñiang ki la pynjulor noh ïa ki jingthung. Khnang ban ïarap na ka bynta ka jingkhlad noh jong u kurim jong ka bad ban kyrshan na ka bynta ka lawei jong ki khun kynthei jong ka, ka kurim jong u Ranganayakulu ka la pan jingïarap na ka sorkar wat lada ki heh ba dei khmih kim pat lum jingtip kaba bniah shaphang kane ka longïing na ka bynta ban ai bailutksan.
Ha ka 16 tarik, Lber, sa uwei pat u nongrep ïa uba la tip kyrteng kum u Sanjeev Kumar jong ka Kalagallu u la ïap hadien ba u la pyndkut hi ïala ka jingim. Une ruh u la shim ïa kane ka sienjam, naba um shym la lah ban siew shuh ïa ka ram kaba T. 14 lak.
U Kumar u dei uba la ju rep soh, sohsaw, bad ki shana badam ha ka jaka kaba heh kumba saw akar. U la ïakynduh jingeh na ka jingduhnong namar ba um shym ïoh ïa ka jingsiew halor u shana badam bad u sohsaw. Naduh u Kyllalyngkot jong u snem 2022, ki la don kumba 11 ngut ki nongrep kiba la pyndkut hi ïala kajong ka jingim ha ka thaiñ. Ha kaba ïadei bad kane, ki heh ba dei khmih ki la ïathuh ba ha ka jingshisha ki la don 12 ngut ki nongrep kiba la pynïap hi ïalade ha ki ar snem ba la leit. “Ngi la tip ba ki la don kumba 12 ngut ki nongrep kiba la ïap da kaba pyndkut hi ïala ka jingim naduh u 2021. Ka tnat ba dei khmih ka la phah ruh ïa ki kaiphot ba ki la don shiphew ngut ki nongrep kiba kum kine sha ka Commissioner of Agriculture Department. Lai tylli kiba kum kine ki longïing ki la ïoh ïa ka bailutksan bad kiwei pat kin sa ïoh shen. Ngi la pynkhreh ïa ka kaiphot sa jong arngut ki nongrep kiba dang sah ha kaba ki la pyndkut hi ïa ka jingim sha ka Commissionerate. Ka jingpyntreikam mynta ka long ban ai jingïarap sha ki ha ka ban pynïoh ïa ka bailutksan sha ki longïing kiba la ïohmad ïa ki jingeh,” la ong u Myntri ka Revenue Divisional Officer jong ka Anantapur u Madhusudhan.
