Srinagar, Jymmang:
Naba ka India ka la pynkhlaiñ ha ka jingpyntreikam kum shi bynta ban pynkhreh ha ka ban pynlong ïa ka G20 ha Srinagar, jong ka Jammu & Kashmir, ha une u bnai ba mynta, ka ri ka la pynkhlaiñ ha ka ban pynjur ïa ki jingpahara ha kylleng ki jaka.
Napdeng ki jaka ba la pynjur ïa ka jingpahara, la ong ba ka kynhun jong ki pulit ka la pynlong ïa ka jingïaid pahara ha ki surok bah bad la ong ba ïa ki pulit yn sa pyntreikam ruh ha ki lad kiba don ha kylleng ki surok ha Srinagar. Shuh shuh la thmu ban pyntreikam ruh da ki buit ban khmih bniah ïa ka jingwan rung jong ki Drone.
Kumba la ïathuh ka tyllong khubor la ong ba ki heh kiba dei khmih ha ka liang ki lad ai jingïada na Jammu & Kashmir ki la ïakren shai bad ka kynhun jong ki shipai ka sorkar kmie na ka bynta ban pynkhlaiñ ïa ka jingpahara bad kiwei pat ki jingpyntreikam kiba ïadei na ka bynta ban ai jingshngaiñ ïa ki nongmihkhmat na ka bynta G20 ha ka thaiñ ha kaba yn sa pynlong ïa ka jingïalang.
“Yn sa pyntreikam ïa ki kynhun ba kyrpang bad ïa ki buit thymmai ha kaba ïadei bad ka jingïakhun pyrshah ïa ki Drone kiba wan na bar ban wanrah na New Delhi ha kaba yn sa pyntreikam ha Srinagar bad ha kiwei pat ki jaka jngohkai pyrthei ha kaba ki nongmihhmat na ka bynta ka G20 kin sa leit ban ïuhkjat.”
“Yn sa buh shuh shuh ïa ki kynhun shipai na UT ha kaba la jied ïa ki jaka ba kin leit ban pynlong ïa ka jingpahara bad la mang ruh ban pyntreikam ïa ki ha Srinagar, Gulmarg bad kiwei pat ki thaiñ kiba duna ha ki lad ai jingïada, khnang ban lah ban pynlong ïa katei ka jingïalang kaba ïaid beit ïaid ryntih kumba la thmu,” ki la ong.
Ki nongmihkhmat najan baroh ki ri kiba shah kynthup ha ka G20, lait noh ka China, ki la dei ban don bynta ha ka jingïalang ha ka Working Group of Tourism ha Srinagar ha ka 23 tarik, Jymmang, la ïathuh ka tyllong khubor kaba la wan na ki heh ba dei khmih.
Ki nongmihkhmat jong ki 20 tylli ki ri kin sa poi ha Srinagar ha ka 22 tarik, Jymmang bad ka jingïalang jong kane ka kynhun kan sa long ha ka 23 tarik, Jymmang.
Kine ki nongmihkhmat kin sa leit jngoh ïa kiba bun ki jaka jngohkai pyrthei ha ka 24 tarik, Jymmang ha Srinagar kynthup shas Dal Lake ha kaba kin sa leit na ka bynta ka Shikara Ride, Dachigam Wildlife Sanctuary bad sha ki katto katne tylli ki jaka jngohkai ha kaba kin sa leit ruh ban jngoh ïa ka Ski-Resort Gulmagr kaba don ha ki bynta ba shaphang Shatei jong ka Kashmir. Kin sa leit phai sha New Delhi ha ka 25 tarik, Jymmang, la ïathuh ka tyllong khubor.
