Raipur, Jymmang:
Arngut ki lehnoh, kynthup kawei ka kynthei, ki la shah pynïap ha ka por ba ka la don ka jingïasiat kaba markylliang bad ki pulit ha Sukma distrik kaba don ha Chhattisgarh hynnin ka step, la ïathuh u heh pulit.
Hadien ka jingïasiat ki pulit ki la ïoh ban kurup ïa kiba bun ki tiar siat bad pynbthei na katei ka jaka ba la jia ka jingïasiat, u la ong, ha kaba u la bynrap shuh shuh da kaba ong ba kine ki lehnoh kiba la shah siat ïap ki dei kiba la shah thong ha ka khlieh jong ki da T. 11 lak.
Kane ka jingïasiat kaba markylliang ka la sdang ha ka por 5.30 mynstep hajan ki jaka kiba long khlaw jong ka Danteshpuram kaba hap hapoh ka jingkhmih jong ki pulit ka Bheji, kaba don ha ka jaka kaba jngai kumba 400 km na ka nongbah Raipur, haba ka kynhun District Reserve Guard (DRG) ka la pynlong ïa ka jingleit thwet lehnoh, la ïathuh u Superintendent of Police jong ka Sukma u Sunil Sharma ha ka jingïakren bad ki nongthoh kyrteng.
Ki pulit ki la ïoh jingtip kaba bniah halor ka jingdon jong u heh nongïalam ka kynhun Golapalli Local Organisation Squad (LOS) u Madkam Erra ha ryngkat ki 30 haduh 35 ngut ki dkhot jong ka kynhun lehnoh.
Haba la ïoh jingtip halor kane, ka kynhun DRG, Central Reserve Police Force (CRPF) bad Commando Battalion for Resolute Action (CoBRA) ki la pynlong ïa ka jingleit thwet lehnoh ha ka miet jong ka sngi U Blei.
Haba kawei na ki kynhun jong ka DRG ki la kerkut ïa ka khlaw Danteshpuram, ki lehnoh Maoist ki la lsiat sha ka phang ba don ma ki, ha kaba nangne ka la mih ka jingïasiat kaba markyllinag, la ïathuh u heh pulit.
Shuh shuh la ïathuh ba hadien ba ka jingïasiat ka la kham kynjah, ki shipai ki la tur bad sdang ban pynlong ïa ka jingleit jurip bniah ha kaba ki la lap ïa ar tylli ki metïap jong ki lehnoh Maoist na katei ka jaka, la ïathuh u heh pulit.
Ïa kine ki lehnoh la ithuh ba dei u LOS Commander u Erra bad ka dkhot ka kynhun ka Podiyam Bhime, kaba dei ka Deputy Commander jong kajuh ka kynhun, la ong u Sharma.
U Erra bad ka Bhime ki la shah thong ha ka khlieh jong ki da T. 8 lak bad T. 3 lak, la ïathuh u heh pulit.
“U Erra, u la long u dkhot jong ka kynhun ki Maoist, bad u la shah pynshisha ba u la donkti ha kiba bun ki kam pyntriem jong ki lehnoh,” u la ong. Ka jingleit thwet lehnoh haduh ba la thoh ïa ka khubor ka dang ïai bteng.
