New Delhi, Jymmang:
Ki la don kumba lai ngut ki nong India kiba la shahkem ha ki heh ka Counter Intelligence Unit jong ki pulit ka Delhi naba ki la don bynta ban khaïi ïa u drok na Pakistan.
Kine kiba la shahkem ki dei kiba la tip kyrteng kum u Malkit Singh, Dharmendra Singh, bad Harpal Singh, kine ki dei ki nongshong shnong jong ka Punjab bad ki la shah kem ha ka kynhun Special Cell jong ka Counter Intelligence Unit na Sarai Kale Khan kaba don ha Delhi.
Ki pulit ki la pynshisha da kaba ong ba kine kiba la shah kynnoh ki ju khaïi ïa u drok na Pakistan lyngba ki Drone, ha Punjab bad ha kiwei pat ki jylla, da kaba ïakylliang bad ka pisa lyngba ka lynti kaba beaiñ na ki runar kiba ju khaïi drok sha Pakistan.
Ki nongkhaïi drok, ïa kiba la shah pynshisha ba ki la phet rieh sha Punjab, ki la don bynta ha kane ka kam bad ki runar ha US bad Philippines, la ïathuh ki pulit. La ïoh ban kurup ïa ki tiar siat na kine kiba la shah kynnoh, la bynrap shuh shuh ki pulit.
Ki Phone Number kiba na Philippines bad US la lap na ki Mobile Phone jong ki ïa kiba la ïoh ban kurup na kine kiba la shah kynnoh.
Ki briew ba la ïatreilang bad ki ki la pyndonkam ïa kine ki number ban batai ïa ki na kano ka jaka ban wan shim ïa ki song jong u drok ba la khaïi na Pakistan lyngba ki Drone, ha kaba hadien kane yn sa pynpoi ïa ki sha ki nongkhaïi kiba ha Punjab.
Kine kiba la shah kynnoh ki ju khaïi ïa u Heroin ha Punjab bad ha kiwei pat ki bynta jong ka ri naduh u snem 2010-2011, la ïathuh ki pulit. Ki pulit jong ka Punjab ki la set ïa kine kiba la shahkem bad ka jingtohkit ïa ki ka dang ïaid shakhmat.
