Bhubaneswar, Jymmang:
Uwei u nongïalam jong ka kynhun ki riewlum u la shah siat ïap ha ki lehnoh Maoist ha Kandhamal distrik kaba don ha Odisha, la ïathuh ki pulit ha ka sngi Palei.
Kane ka jingjia ka la jia ha ka shnong Saulipada ha ka miet jong ka sngi Balang, la ïathuh ki pulit.
Ïa une uba la shah pynïap la tip kyrteng kum u Subal Kanhar, une u la long u Sarpanch uba rim, la ïathuh u Tapan Kumar Nahak, uba long u Inspector-in-charge jong ka jaka treikam jong ki pulit kaba don ha Phiringia.
Ka kynhun jong palat 10 ngut ki lehnoh Maoist ka la leit sha katei ka shnong bad rung hapoh ka ïing jong u Kanhar.
Haba ki la ïoh ban rung hapoh ïing, ki la tan ïa u sha bar shnong bad ki la siat ïap ïa u, la ïathuh ka tyllong khubor kaba la wan na ki pulit.
Ki lehnoh Maoist ki la suba ïa Kanhar ba u la long u nongphah khubor shaphang jong ki sha ki pulit.
Hadien ba la ïoh ïa kiba bun ki khubor byrngem na ki lehnoh Maoist, u Kanhar u la mih na ka shnong bad leit sha Balliguda, ka jaka ha kaba u la sah ha ki saw snem ba la leit, u la leit phai ïing ha ki ar bnai ba la leit hadien ba ka la don ka jaka treikam jong ki pulit ka tnat CRPF ha marjan shnong, la ïathuh ki nongshong shnong.
Hadien ba la jia kane ka jingshah pynïap briew, ki nongshong shnong ki la sdang ban phet shnong naba ki la dap da ka jingsheptieng.
Ki pulit ki la ïathuh ba ka jingleit thwet ïa ki lehnoh kiba la donkti ha kane ka jingjia ka dang ïai bteng haduh mynta.
