New Delhi, Jymmang:
Hapdeng ka por ba dang don ka jingthombor jong ki lehnoh ha ki bynta jong ka ri, ki shipai ka Pakistan ki la ïaleh ban pynbun ïa ki lehnoh ha kiba bun ki jaka ïasiat jong ki kiba don ha ki bynta jong u Line of Control (LoC) bad ka India.
“La i ba wat lada ki kam pyntriem jong ki lehnoh kiba dang bteng kim ktah ïa ka jingkyrshan jong ki ha kaba ïadei bad ka jingpynjur ïa ki kam pyntriem, ka la nang pynbun ïa ki lehnoh ha kiba bun ki jaka ïasiat bad ki jaka ïasiat jong ki lehnoh kiba don ha ki bynta jong u Line of Control (LoC) bad ka India. Ki kynhun wad bniah ki la ïoh jingtip ba ki lehnoh ki la wan sha ki jaka siat na ki ktem jong ki bad ki la ap ha ki bynta khappud ban ïoh ban rung da kaba suk sha India,” la ïathuh ka tyllong khubor.
Kumba la ïathuh ka tyllong khubor, la ong ba kiba bun ki kynhun jong ki lehnoh kumba la antad ba ki la don ha kawei kawei ka kynhun da kumba 10-20 ngut ki dang ap ha ki jaka siat kiba don ha Neelam Valley, Leepa Valley bad Jhelum Valley.
“Ki shipai ïada khappud jong ka ri ki la pynkhlaiñ ïa ka jingpahara bad ka jingpeitngor ha kaba ïadei bad ki kam ba la leh da ki shipai ka Pakistan bad ki kynhun lehnoh ba la kyrshan da kane ka ri ha ki bynta kiba hap hapoh ka ri India. Ki kynhun jong ki lehnoh Pakistan ki la treikam bha da ka jingïarap jong ki shipai Pakistan bad ka sorkar jong ki ka la don jingthmu ban leh ïa ki kam thombor ha kaba ïadei bad ka jingdon jong ka G-20 Meeting ha Kashmir ha ka 23 bad ka 24 tarik, Jymmang,” la ïathuh ka tyllong khubor.
Haba la buh jingkylli ha kaba ïadei bad ki kam jong ki shipai Pakistan ha ki bynta jong u LoC bad lada ki la pynduna ne em ïa ki shipai ha kitei ki thaiñ kiba marjan bad ka ri India bad pynduna ne em ki kam thombor ha ki bynta jong ka ri, ka tyllong khubor ka la ïathuh, “Kam shym la don kano kano ka jingpynduna ha kaba ïadei bad ka jingdon jong ki shipai da ka Pakistan naba ki la ïaleh ban nang pynbun ïa ki shipai ha katei ka thaiñ na ka bynta ban pynbiang ïa ki jingdonkam kumba ki thmu. “
Ki kam pyntriem jong ki shipai Pakistan ha ki bynta jong u LoC ki la kham duna hynrei kam shym la pynduna ïa ka jingpyntreikam ïa ki shipai, la ïathuh ka tyllong khubor.
U Myntri korbar ri jong ka Pakistan u Bilawal Bhutto, ha ka taïew ba la lah u la phah ka jingbyrngem ha kaba ïadei bad ka jingdon jong ka G-20 Meeting ha Kashmir ha kaba u la ong, “Ngin sa ai ïa ka jubab ynda la dei ka por….” ha ka por ba la don ka jingïalang bad ki nongthoh khubor ha Goa hadien ba la kut ka SCO Foreign Minister’s Meeting.
